ന്യൂ ഡെൽഹി: കുടിയേറ്റ തൊഴിലാളികളുടെ മരണം മുതൽ കർഷക ആത്മഹത്യകൾ വരെയുള്ള നിരവധി വിഷയങ്ങളിൽ രേഖകളില്ലെന്ന മറുപടി പാർലമെന്റിൽ ആവർത്തിക്കുന്ന കേന്ദ്രസർക്കാരിനെ പരിഹസിച്ച് ശശി തരൂർ എംപി. എൻഡിഎ എന്നാൽ നോ ഡാറ്റ അവൈലബിൾ എന്നാണെന്ന് തരൂർ ട്വീറ്റ് ചെയ്തു.
“കുടിയേറ്റ തൊഴിലാളികളെക്കുറിച്ച് ഡാറ്റ ഇല്ല, കർഷക ആത്മഹത്യകളെക്കുറിച്ച് ഡാറ്റയില്ല, ധനസ്ഥിതി സംബന്ധിച്ച് തെറ്റായ വിവരങ്ങൾ, കോവിഡ് മരണങ്ങളെക്കുറിച്ചുള്ള സംശയാസ്പദമായ ഡാറ്റ, ജിഡിപി വളർച്ചയെക്കുറിച്ച് അവ്യക്തമായ ഡാറ്റ – ഈ സർക്കാർ ‘എൻഡിഎ’ എന്ന പദത്തിന് ഒരു പുതിയ അർത്ഥം നൽകുന്നു!“- തരൂർ ട്വീറ്റ് ചെയ്തു. പ്രധാനമന്ത്രി നരേന്ദ്ര മോദി, ധനമന്ത്രി നിർമല സീതാരാമൻ, ആഭ്യന്തര മന്ത്രി അമിത് ഷാ എന്നിവരുടെ കാർട്ടൂണിനൊപ്പമാണ് തരൂരിന്റെ ട്വീറ്റ്.
No #data on migrant workers, no data on farmer suicides, wrong data on fiscal stimulus, dubious data on #Covid deaths, cloudy data on GDP growth — this Government gives a whole new meaning to the term #NDA! pic.twitter.com/SDl0z4Hima
— Shashi Tharoor (@ShashiTharoor) September 22, 2020
പാർലമെന്റിൽ കർഷകരുടെ ആത്മഹത്യ, ലോക്ഡൗണിനിടെ എത്ര കുടിയേറ്റ തൊഴിലാളികൾ മരിച്ചു?, കോവിഡ് പ്രതിസന്ധിയിൽ എത്രപേർക്ക് തൊഴിൽ നഷ്ടമായി?, എത്ര അനധികൃത കുടിയേറ്റക്കാർ രാജ്യത്തുണ്ട്? കോവിഡ് ബാധിച്ച് രാജ്യത്ത് എത്ര ഡോക്ടർമാരും ആരോഗ്യപ്രവർത്തകരും മരിച്ചു?, രാജ്യത്ത് എത്ര പ്ലാസ്മ ബാങ്കുകൾ ഉണ്ട്? എന്നീ ചോദ്യങ്ങൾക്കാണ് കേന്ദ്ര സർക്കാർ വിവരങ്ങൾ ലഭ്യമല്ലെന്ന മറുപടി നൽകിയത്. ഇത് പ്രതിപക്ഷ പ്രതിഷേധത്തിന് ഇടയാക്കിയിട്ടുണ്ട്.
Also Read: പുറത്താക്കപ്പെട്ട എംപിമാർക്ക് ഐക്യദാർഢ്യം; നിരാഹാര സമരം പ്രഖ്യാപിച്ച് ശരദ് പവാർ