കൽക്കിയുടെ ചരിത്രനോവൽ ആധാരമാക്കി മണിരത്‌നം ഒരുക്കുന്ന ബ്രഹ്‌മാണ്ഡ ചിത്രം പൊന്നിയിൻ സെൽവൻ ഒന്നാം ഭാഗത്തിന്റെ ടീസർ എല്ലാ ഭാഷകളിലും സൂപ്പർ ഹിറ്റ്. കഴിഞ്ഞ ദിവസമാണ് തമിഴ്, മലയാളം, കന്നഡ, ഹിന്ദി, തെലുങ്ക് തുടങ്ങി അഞ്ച് ഭാഷകളിൽ പുറത്തിറങ്ങിയത്. പ്രമുഖർ പങ്കെടുത്ത വർണാഭമായ ചടങ്ങിലായിരുന്നു ടീസർ റിലീസ്. 1.20 മിനിറ്റ് ദൈർഘ്യമുള്ള ചിത്രത്തിന്റെ തമിഴ് ടീസർ ഇതിനോടകം 6.5 മില്യൺ കടന്നു. ഒറ്റ ദിവസം കൊണ്ടാണ് ഇത്രയും കാഴ്‌ചക്കാർ.
ഇന്ത്യൻ സിനിമയുടെ ചരിത്രത്തിൽ തന്നെ വമ്പൻ താരനിരയുമായി എത്തുന്ന ചിത്രം തിയേറ്ററുകളിൽ എത്താൻ അക്ഷമരായി കാത്തിരിക്കുകയാണ് ആരാധകർ. വിക്രം, കാർത്തി, ജയം രവി, ജയറാം, ഐശ്വര്യ റായി, തൃഷ, ഐശ്വര്യ ലക്ഷ്‍മി തുടങ്ങി നിരവധി മുൻനിരതാരങ്ങൾ ചിത്രത്തിൽ അണിനിരക്കുന്നു.
500 കോടി മുതൽമുടക്കിൽ ഒരുങ്ങുന്ന ചിത്രം മണിരത്‌നത്തിന്റെ ഉടമസ്‌ഥതയിലുള്ള മദ്രാസ് ടാക്കീസും ലൈക പ്രൊഡക്ഷനും ചേർന്നാണ് നിർമിച്ചിരിക്കുന്നത്. അതിഗംഭീര സെറ്റും കണ്ണഞ്ചിപ്പിക്കുന്ന യുദ്ധരംഗങ്ങൾകൊണ്ടും സമ്പുഷ്‌ടമാണ് പൊന്നിയിൻ സെൽവൻ ടീസർ. ജയം രവിയാണ് പൊന്നിയിൻ സെൽവനായി എത്തുന്നത്. കല്‍ക്കി കൃഷ്‌ണമൂര്‍ത്തിയുടെ ഇതേ പേരുള്ള തമിഴ് നോവലിനെ ആധാരമാക്കിയാണ് സിനിമ ഒരുങ്ങുന്നത്. ചോള രാജാവായിരുന്ന അരുൾമൊഴി വർമനെ (രാജരാജ ചോളൻ ഒന്നാമൻ) കുറിച്ചുള്ളതാണ് 2400 പേജുള്ള ഈ നോവൽ.
ചിത്രത്തിന്റെ സംഗീതം എആർ റഹ്‌മാനും ഛായാഗ്രഹണം രവി വര്‍മനുമാണ്. ഇളങ്കോ കുമാരവേലാണ് തിരക്കഥ. സെപ്‌റ്റംബർ 30ന് ചിത്രം റിലീസ് ചെയ്യാനാണ് തീരുമാനിച്ചിരിക്കുന്നത്.
Most Read: അവധി കഴിഞ്ഞെത്തിയപ്പോൾ സ്‌കൂൾ കാണാനില്ല; നടുറോഡിൽ കുട്ടികളെ പഠിപ്പിച്ച് അധ്യാപകർ
