ന്യൂഡെൽഹി: റിലയൻസ് ജിയോയുടെ 5ജി സേവനങ്ങൾ രാജ്യത്ത് അടുത്ത വർഷം മുതൽ ലഭ്യമാക്കുമെന്ന് ചെയർമാൻ മുകേഷ് അംബാനി. 2021 രണ്ടാം പകുതിയോടെ സേവനങ്ങൾ തുടങ്ങിയേക്കുമെന്നും അദ്ദേഹം പ്രഖ്യാപിച്ചു. ഇന്ത്യ മൊബൈൽ കോൺഗ്രസിൽ സംസാരിക്കുകയായിരുന്നു അദ്ദേഹം. അടുത്ത രണ്ടോ മൂന്നോ വർഷങ്ങൾക്കകം രാജ്യത്ത് 5ജി അവതരിപ്പിക്കുമെന്ന് ഭാരതി എയർടെൽ മേധാവി സുനിൽ മിത്തൽ കഴിഞ്ഞ ദിവസം പ്രഖ്യാപിച്ചിരുന്നു. ഇതിന് പിന്നാലെയാണ് അംബാനിയുടെ അറിയിപ്പ്.
ഇന്ത്യയിൽ 5ജി വിപ്ളവത്തിന്റെ മുൻപന്തിയിൽ ജിയോ ഉണ്ടാകും. അതിനായി നയപരമായ നടപടികൾ സ്വീകരിക്കണം. സേവനത്തിന് വേണ്ട സാങ്കേതിക വിദ്യയും ഉപകരണ സാമഗ്രികളും പ്രാദേശികമായി നിർമിക്കും. ആത്മനിർഭർ ഭാരതിനായുള്ള രാജ്യത്തിന്റെ ശ്രമങ്ങൾക്ക് 5ജി സഹായകരമാകുമെന്നും അംബാനി അഭിപ്രായപ്പെട്ടു.
2021 രണ്ടാം പകുതിയോടെ 5ജി യാഥാർഥ്യമാകും. പ്രാദേശികമായി വികസിപ്പിച്ചെടുക്കുന്ന ശൃംഖലയും ഹാർഡ്വെയറും സാങ്കേതിക വിദ്യയുമായിരിക്കും ഇതിനായി ഉപയോഗിക്കുക. നാലാം വ്യാവസായിക വിപ്ളവത്തിനെ മുന്നിൽ നിന്ന് നയിക്കാൻ 5ജി നെറ്റ്വർക്ക് ഇന്ത്യയെ പ്രാപ്തമാക്കുമെന്നും മുകേഷ് അംബാനി വ്യക്തമാക്കി.
Read also: ചരിത്രത്തിൽ ആദ്യമായി സൗദി സന്ദർശിക്കാൻ ഒരുങ്ങി ഇന്ത്യൻ കരസേനാ മേധാവി