സാമൂഹിക മാദ്ധ്യമ ലോകത്ത് വൈറലായി മാറിയ ‘സബാഷ് ചന്ദ്രബോസ്’ ട്രെയ്ലർ സിനിമയുടെ വിജയം സൂചിപ്പിച്ച് മുന്നേറുകയാണ്. തൊണ്ണൂറുകളുടെ പകുതി വരെ നമ്മുടെയൊക്കെ വീടുകളിൽ ഉണ്ടായിരുന്ന സ്ഥിതിവിശേഷവും അതിനെ തുടർന്നുണ്ടാകുന്ന രസകരമായ അനുഭവങ്ങളും കോർത്തിണക്കുന്ന ചിത്രമാണ് ‘സബാഷ് ചന്ദ്രബോസ്’.
1990 കളിൽ കളര് ടിവി സൃഷ്ടിച്ച കുടുംബ കലാപങ്ങളുടെ ഗൃഹാതുര ഓർമകളിലേക്ക് നമ്മെ നയിക്കുന്ന ‘സബാഷ് ചന്ദ്രബോസ്’ ട്രെയ്ലറിൽ വിഷ്ണു ഉണ്ണികൃഷ്ണനും, ജോണി ആന്റണിയും തകർത്ത് അഭിനയിക്കുന്ന നർമ മുഹൂർത്തങ്ങളാണ് കാണാനാവുന്നത്. ഇവർ രണ്ടുപേരും പ്രധാന കഥാപാത്രങ്ങളെ അവതരിപ്പിക്കുന്ന ഈ ‘ഫാമിലി എന്റർടെയിനര്’ ചിത്രം ഓഗസ്റ്റ് 5ന് തിയേറ്ററിലെത്തുമെന്നാണ് അണിയറപ്രവർത്തകർ അറിയിക്കുന്നത്.
ഏറെ നിരൂപക ശ്രദ്ധ നേടിയ ‘ആളൊരുക്കം’ എന്ന ഇന്ദ്രൻസ് ചിത്രം സംവിധാനം ചെയ്ത വിസി അഭിലാഷ് ഒരുക്കുന്ന ചിത്രത്തിൽ സ്നേഹ പാലിയേരി നായികയാവുന്നു. ബോളിവുഡ് താരം മുകേഷ് തിവാരി, ധര്മ്മജന് ബോള്ഗാട്ടി, ജാഫര് ഇടുക്കി, ഇര്ഷാദ്, സുധി കോപ്പ, കോട്ടയം രമേശ്, രമ്യ സുരേഷ്, ശ്രീജ ദാസ്, അദിതി മോഹൻ, ഭാനുമതി പയ്യന്നൂർ, മുഹമ്മദ് എരവട്ടൂർ, ബാലു തുടങ്ങിയ താരനിര ചിത്രത്തിൽ അഭിനേതാക്കളായി എത്തുന്നുണ്ട്.
വിസി അഭിലാഷിന്റെ തിരക്കഥയിൽ ഒരുങ്ങുന്ന ചിത്രം നിർമിച്ചിരിക്കുന്നത് ജോളിവുഡ് മൂവീസിന്റെ ബാനറിൽ ജോളി ലോനപ്പനാണ്. നിരവധി ദേശീയ-അന്തർദേശീയ പുരസ്കാരങ്ങൾ നേടിയ അഭിലാഷിന്റെ ‘ആളൊരുക്കം’ നിർമിച്ചതും ജോളി ലോനപ്പനായിരുന്നു.
വിഷ്ണു ഉണ്ണിക്കൃഷ്ണന് ഫാക്ടറി ജീവനക്കാരനായ ചന്ദ്രബോസിനെ അവതരിപ്പിക്കുന്ന ‘സബാഷ് ചന്ദ്രബോസ്’ ജുറാസിക് പാർക്ക് അടക്കമുള്ള വിദേശ സിനിമകൾ കേരളത്തിലെത്തിച്ച ക്യാപ്പിറ്റൽ സ്റ്റുഡിയോസ് ആണ് തിയേറ്ററുകളിൽ എത്തിക്കുന്നത്. ഉണ്ട’, ‘സൂപ്പർ ശരണ്യ’ എന്നീ ചിത്രങ്ങൾക്ക് ശേഷം സജിത്ത് പുരുഷൻ ക്യാമറ കൈകാര്യം ചെയ്യുന്ന ചിത്രം കൂടിയാണ് സബാഷ് ചന്ദ്രബോസ്’.
കഥാ പശ്ചാത്തലം
കളർ ടെലിവിഷനുകൾ വലിയ സംഭവമായിരുന്ന കാലത്ത് ഗ്രാമങ്ങളിൽ ഉണ്ടായിരുന്ന സ്ഥിതിവിശേഷമാണ് ‘സബാഷ് ചന്ദ്രബോസ്’ കൈകാര്യം ചെയുന്ന വിഷയം. പുരപ്പുറത്ത് കയറിയും വാട്ടർ ടാങ്കിനു മുകളിൽ കയറിയും നീളമുള്ള ടിവി ആന്റിനയിലൂടെ വരുന്ന സിഗ്നൽ ശരിയായി കിട്ടാൻവേണ്ടി ഇളക്കിനോക്കി കൃത്യമാക്കിയിരുന്ന 1980–1990 കാലമാണ് ചിത്രത്തിന്റെ കാലഘട്ടം.
Health News: എന്താണ് സ്കീസോഫ്രീനിയ; ചിന്തയേയും പെരുമാറ്റത്തേയും ബാധിക്കുന്ന മാനസിക ദൗർബല്യം