തിരുവനന്തപുരം: കനത്ത മഴയെ തുടർന്ന് സംസ്ഥാനത്തെ അണക്കെട്ടുകളിൽ ജലനിരപ്പ് ഉയരുന്നു. ഇതേ തുടർന്ന് സംസ്ഥാനത്തെ 7 അണക്കെട്ടുകളിൽ നിലവിൽ റെഡ് അലർട് പ്രഖ്യാപിച്ചിരിക്കുകയാണ്. ചെറുതോണി, മൂഴിയാർ, പെരിങ്ങൽക്കുത്ത് എന്നിവയടക്കം 7 ഡാമുകളിലാണ് റെഡ് അലർട് പ്രഖ്യാപിച്ചിരിക്കുന്നത്.
കൂടാതെ തൃശൂർ, പാലക്കാട് ജില്ലകളിലെ ജലസേചന അണക്കെട്ടുകളിലും നിലവിൽ റെഡ് അലർട് പ്രഖ്യാപിച്ചിരിക്കുകയാണ്. ഇടുക്കി അണക്കെട്ടിൽ 2,399.10 അടി ജലമാണ് നിലവിലുള്ളത്. ഡാമിന്റെ വൃഷ്ടി പ്രദേശത്ത് ഇപ്പോഴും കനത്ത മഴ തുടരുകയാണ്. എന്നാൽ ജലനിരപ്പ് ഉയരുന്നത് സാവധാനത്തിൽ ആയതിനാൽ കൂടുതൽ ജലം തുറന്നു വിടേണ്ടി വരില്ലെന്നാണ് അധികൃതർ വിലയിരുത്തുന്നത്.
അതേസമയം ജലനിരപ്പ് ഉയർന്ന സാഹചര്യത്തിൽ ഇന്നലെ ഇടുക്കി അണക്കെട്ട് തുറന്നിരുന്നു. 40 സെന്റീമീറ്റർ ഉയരത്തിൽ ഇടുക്കി അണക്കെട്ടിന്റെ മൂന്നാമത്തെ ഷട്ടറാണ് തുറന്നത്. കൂടാതെ മുല്ലപ്പെരിയാർ അണക്കെട്ടിലെ നിലവിൽ ജലനിരപ്പ് 140 അടി പിന്നിട്ടു. 140.30 അടി ജലമാണ് ഇപ്പോൾ മുല്ലപ്പെരിയാർ അണക്കെട്ടിലുള്ളത്.
Read also: വടക്ക്-കിഴക്കൻ മേഖലയിലെ ഭീകരവാദ സംഘടനകൾക്ക് പിന്നിൽ ചൈന; റിപ്പോർട്