അബുദാബി: ഗതാഗത നിയമ ലംഘനത്തിന് പിഴ വർദ്ധിപ്പിച്ച് അബുദാബി. റെഡ് സിഗ്‌നൽ മറികടന്നാൽ ഇനി മുതൽ 50,000 ദിർഹം പിഴയടക്കേണ്ടിവരും. മത്സരയോട്ടം, നമ്പർ പ്ലേറ്റ് ഇല്ലാതെ വാഹനം ഓടിക്കുക, പോലീസ് വാഹനങ്ങൾക്ക് കേടുപാടുണ്ടാക്കുക തുടങ്ങിയവക്കും 50,000 ദിർഹമാണ് പിഴ, ഒപ്പം ആറു മാസത്തേക്ക് ലൈസൻസ് റദ്ദാക്കുകയും ചെയ്യും. വാഹനത്തിന്റെ എൻജിനിലോ ഷാസിയിലോ മാറ്റം വരുത്തിയാൽ 10,000 ദിർഹം ആണ് പിഴ.
അമിത വേഗം, പെട്ടന്ന് വഴിമാറുക, അകലം പാലിക്കാതെ വാഹനമോടിക്കുക, സീബ്രാ ലൈനിൽ കാൽനട യാത്രക്കാർക്ക് മുൻഗണ നൽകാതിരിക്കുക തുടങ്ങിയ കാരണങ്ങളാൽ അപകടമുണ്ടായാൽ 5000 ദിർഹമാണ് പിഴ. പത്തുവയസ്സിൽ താഴെയുള്ള കുട്ടികളെ മുൻസീറ്റിൽ ഇരുത്തിയാൽ 5000 ദിർഹം പിഴ ചുമത്തുകയും വാഹനം കണ്ടുകെട്ടുകയും ചെയ്യും. 7000 ദിർഹത്തിനു മുകളിലുള്ള എല്ലാ പിഴകളും ഒറ്റത്തവണയായി അടക്കണമെന്നും പോലീസ് അറിയിച്ചു. കൂടാതെ, പിടിച്ചെടുത്ത വാഹനം മൂന്നുമാസത്തിനു ശേഷം തിരിച്ചെടുത്തില്ലെങ്കിൽ ലേലത്തിനു വക്കുമെന്നും പോലീസ് മുന്നറിയിപ്പു നൽകി.
