ശ്രീനഗര്‍: അഭിഭാഷകയും മനുഷ്യാവകാശ പ്രവര്‍ത്തകയുമായ അഡ്വ. ദീപിക സിംഗ് രജാവത്ത് കോണ്‍ഗ്രസിലേക്ക്. ജമ്മുവിൽ ഞായറാഴ്‌ച രാവിലെ നടക്കുന്ന ചടങ്ങിൽ ദീപിക കോണ്‍ഗ്രസ് അംഗത്വം സ്വീകരിക്കുമെന്നാണ് റിപ്പോർട്.
കോണ്‍ഗ്രസില്‍ ചേരുന്നതുമായി ബന്ധപ്പെട്ടുള്ള ഒരു ക്ഷണക്കത്ത് സോഷ്യൽ മീഡിയയിൽ പുറത്തിറങ്ങിയിട്ടുണ്ട്. ‘രാജ്യത്തെ ഏറ്റവും പഴക്കമേറിയ ജനാധിപത്യ രാഷ്‌ട്രീയ പാര്‍ട്ടിയായ കോണ്‍ഗ്രസിലേക്ക് അഡ്വ. ദീപിക സിംഗ് രജാവത്ത് ചേരുന്നുവെന്ന് സന്തോഷത്തോടെ അറിയിക്കുന്നു.
ജമ്മുവിലെ ഫോര്‍ച്യൂണ്‍ ഇന്റർനാഷണലിൽ വെച്ച് 2021 ഒക്‌ടോബർ 10ന് രാവിലെ 11 മണിക്ക് പാര്‍ട്ടി പ്രവേശന ചടങ്ങ് നടക്കും’- എന്നാണ് കത്തില്‍ പറയുന്നത്.
കത്‌വ പീഡനക്കേസില്‍ പെണ്‍കുട്ടിക്ക് നീതി ലഭിക്കാനായി നിയമപോരാട്ടം നടത്തിയതിലൂടെയാണ് ദീപിക സിംഗ് രജാവത്ത് ശ്രദ്ധിക്കപ്പെടുന്നത്. കേസ് അട്ടിമറിക്കാന്‍ ശ്രമിച്ച ഹിന്ദുത്വവാദികള്‍ക്കെതിരെ ദീപിക ശക്‌തമായി നിലകൊണ്ടിരുന്നു.
നേരത്തെ കേരള നിയമസഭാ തിരഞ്ഞെടുപ്പിൽ യുഡിഎഫ് സ്‌ഥാനാർഥി ആയിരുന്ന പികെ ഫിറോസിനൊപ്പം താനൂരിലെ റോഡ് ഷോയില്‍ ദീപിക സിംഗ് രജാവത്ത് പങ്കെടുത്തിരുന്നു.
Most Read: ലഹരിപ്പാർട്ടി: എൻസിബി മൂന്നുപേരെ വെറുതെവിട്ടു; വീഡിയോ പിറത്തുവിട്ട് മഹാരാഷ്‍ട്ര മന്ത്രി
