കൊച്ചി: പെട്രോളിനും, ഡീസലിനും പാചക വാതകത്തിനും തുടര്ച്ചയായി വില കൂട്ടുന്നതിനിടെ രാജ്യത്തെ സിഎന്ജി (കംപ്രസ്ഡ് നാച്ചുറൽ ഗ്യാസ്) വിലയും വര്ധിപ്പിച്ചു. ഒരു കിലോ സിഎന്ജിക്ക് ഒറ്റയടിക്ക് എട്ട് രൂപയാണ് വര്ധിപ്പിച്ചത്. ഇതോടെ കൊച്ചിയില് സിഎന്ജി വില 72 രൂപയില് നിന്നും 80 രൂപയായി ഉയര്ന്നു. മറ്റ് ജില്ലകളില് ഇത് 83 രൂപവരെ ഉയരാന് സാധ്യതയുണ്ടെന്നാണ് റിപ്പോർട്.
കഴിഞ്ഞ രണ്ട് ആഴ്ചക്കിടെ രാജ്യത്ത് തുടര്ച്ചയായി 11 തവണയാണ് ഇന്ധന വില വര്ധിപ്പിച്ചത്. സംസ്ഥാനത്ത് 6.98 രൂപയാണ് പ്രെട്രോളിന് കൂട്ടിയത്. ഇക്കാലയളവില് ഡീസലിന് 6.74 രൂപയും വര്ധിച്ചു. സംസ്ഥാനത്തെ ഡീസല് വില വീണ്ടും ലിറ്ററിന് 100 രൂപ പിന്നിട്ടിരിക്കുകയാണ്. തിരുവനന്തപുരം ജില്ലയിലാണ് ഡീസല് വില 100 രൂപ കടന്നത്. ജില്ലയില് ഒരു ലിറ്റര് ഡീസലിന് 100.14 രൂപയായി ഉയര്ന്നു.
കഴിഞ്ഞ വർഷം ഒക്ടോബർ 11ന് സംസ്ഥാനത്ത് ഡീസൽ വില 100 കടന്നിരുന്നു. എന്നാൽ നവംബറിൽ എക്സൈസ് ഡ്യൂട്ടി കുറച്ചപ്പോൾ വില നൂറിൽ നിന്ന് താഴുകയായിരുന്നു. അഞ്ച് സംസ്ഥാനങ്ങളിലെ തിരഞ്ഞെടുപ്പിനെ തുടർന്ന് കഴിഞ്ഞ നാല് മാസമായി ഇന്ധന വില വർധിപ്പിച്ചിരുന്നില്ല. എന്നാൽ കഴിഞ്ഞ ഒരാഴ്ചയായി ദിവസവും വില കൂടുകയാണ്. വരും ദിവസങ്ങളിലും ഇന്ധന വില കൂടുമെന്നാണ് കരുതുന്നത്.
Most Read: ‘ലാല്ജോസ്’ ഹിറ്റ്ഗാനങ്ങൾക്ക് പിറകിൽ യുവ സംഗീത സംവിധായകന് ബിനേഷ് മണി