വാഷിങ്ടൺ: നരേന്ദ്ര മോദി സർക്കാരിന്റെ കാർഷിക നിയമങ്ങൾക്ക് ഇന്ത്യയിലെ കർഷകരുടെ വരുമാനം വർധിപ്പിക്കാനുള്ള ശേഷിയുണ്ടെന്ന് ഐഎംഎഫ് മുഖ്യ സാമ്പത്തിക ഉപദേശക ഗീതാ ഗോപിനാഥ്‌ അഭിപ്രായപ്പെട്ടു. എന്നാൽ ദുർബലരായ കൃഷിക്കാർക്ക് സാമൂഹിക സുരക്ഷാവലയം ഒരുക്കേണ്ടതുണ്ടെന്നും അവർ കൂട്ടിച്ചേർത്തു. കാർഷിക നിയമവുമായി ബന്ധപ്പെട്ട ചോദ്യങ്ങൾക്ക് ഉത്തരം നൽകുകയായിരുന്നു ഗീതാ ഗോപിനാഥ്‌.
അടിസ്‌ഥാന സൗകര്യങ്ങളിലടക്കം ഇന്ത്യയിലെ കാർഷിക രംഗത്ത് ഒട്ടേറെ പരിഷ്‌കാരങ്ങൾ അനിവാര്യമാണ്. പുതിയ നിയമങ്ങൾ വിപണനത്തിലാണ് ശ്രദ്ധ കൂടുതൽ നൽകിയിരിക്കുന്നത്. കൃഷിക്കാരുടെ വിപണി സാധ്യത വിശാലമാക്കുന്നതാണിത്.
നികുതി അടക്കാത്ത ചന്തകൾക്ക് പുറമെ രാജ്യത്തെവിടെ വേണമെങ്കിലും ഉൽപ്പന്നങ്ങൾ വിൽക്കാനുള്ള സൗകര്യം കർഷകരുടെ വരുമാനം വർധിപ്പിക്കും. ഏതൊരു പരിഷ്‌കാരം നടപ്പാക്കുന്നതിനും പരിവർത്തന ചെലവുകൾ ആവശ്യമുണ്ട്. ഇത് ദുർബലരായ കർഷകരെ ബാധിക്കുന്നില്ലെന്ന് ഉറപ്പ് വരുത്തണം. ഈ വിഷയത്തിൽ ഇപ്പോൾ ചർച്ച നടക്കുകയാണെന്നും ഗീത ഗോപിനാഥ്‌ പറഞ്ഞു.
Read also: ജാഗ്രതക്കുറവ് കോവിഡ് കേസുകൾ കൂട്ടി, പരിശോധന വർധിപ്പിക്കും; നിയന്ത്രണം ലഘിച്ചാൽ കർശന നടപടി
