തിരുവനന്തപുരം: വിദേശത്ത് പോകുന്നവര്ക്ക് നല്കുന്ന വാക്സിനേഷന് സര്ട്ടിഫിക്കറ്റില് ബാച്ച് നമ്പരും തീയതിയും കൂടി ചേര്ക്കുമെന്ന് അറിയിച്ച് ആരോഗ്യ വകുപ്പ് മന്ത്രി വീണാ ജോര്ജ്. വാക്സിനെടുത്ത തീയതിയും വാക്സിന്റെ ബാച്ച് നമ്പരും ചില വിദേശ രാജ്യങ്ങള് ആവശ്യപ്പെടുന്ന പശ്ചാത്തലത്തിലാണ് സര്ട്ടിഫിക്കറ്റില് ഇവകൂടി ചേര്ക്കാന് സര്ക്കാര് നിര്ദ്ദേശം നല്കിയത്.
ഇ- ഹെല്ത്തിന്റെ പോര്ട്ടലില് ഇതിനായി അപ്ഡേഷന് നടത്തിവരികയാണെന്നും അടുത്ത ദിവസം മുതല് തന്നെ ബാച്ച് നമ്പരും തീയതിയും ഉൾപ്പടെയുള്ള പുതിയ സര്ട്ടിഫിക്കറ്റ് ലഭിക്കുന്നതാണെന്നും മന്ത്രി വ്യക്തമാക്കി.
നേരത്തെ ബാച്ച് നമ്പരും തീയതിയും ഇല്ലാത്ത സര്ട്ടിഫിക്കറ്റ് എടുത്ത ആളുകൾക്ക് ആവശ്യമെങ്കിൽ അവകൂടി ചേര്ത്ത് പുതിയ സര്ട്ടിഫിക്കറ്റ് നല്കുമെന്നും മന്ത്രി അറിയിച്ചു.
ഇതിനായി നേരത്തെ സര്ട്ടിഫിക്കറ്റ് എടുത്തവര് സംസ്ഥാന സര്ക്കാരിന്റെ https://covid19.kerala.gov.in/vaccine/ എന്ന പോര്ട്ടലില് പ്രവേശിച്ച് പഴയ സര്ട്ടിഫിക്കറ്റ് ക്യാന്സല് ചെയ്തതിന് ശേഷമാണ് പുതിയതിന് അപേക്ഷിക്കേണ്ടത്. ബാച്ച് നമ്പരും തീയതിയുമുള്ള കോവിന് (COWIN) സര്ട്ടിഫിക്കറ്റ് ലഭിച്ചിട്ടുള്ളവര് അത് പോര്ട്ടലില് അപ്ലോഡ് ചെയ്യേണ്ടതാണ്. എന്നാൽ കോവിന് പോര്ട്ടലില് നിന്നും സര്ട്ടിഫിക്കറ്റ് ലഭിക്കാത്തവര് വാക്സിന് എടുത്ത കേന്ദ്രത്തില് നിന്നും ബാച്ച് നമ്പരും തീയതിയും കൂടി എഴുതി വാങ്ങിയ സര്ട്ടിഫിക്കറ്റ് അപ്ലോഡ് ചെയ്യേണ്ടതാണ്. സമര്പ്പിക്കപ്പെട്ട അപേക്ഷകള് പരിശോധിച്ച് തീയതിയും ബാച്ച് നമ്പരുമുള്ള പുതിയ സര്ട്ടിഫിക്കറ്റ് നല്കും.
അപേക്ഷിച്ചവര്ക്ക് തന്നെ പിന്നീട് സര്ട്ടിഫിക്കറ്റ് ഈ പോര്ട്ടലില് നിന്നും ഡൗണ്ലോഡ് ചെയ്യാം. ഇപ്പോള്, വാക്സിന് എടുത്ത് വിദേശത്ത് പോകുന്നവര്ക്ക് ഉടന് തന്നെ സര്ട്ടിഫിക്കറ്റ് നല്കുന്നതിനുള്ള ക്രമീകരണങ്ങള് പോര്ട്ടലില് വരുത്തിയിട്ടുണ്ട്.
വാക്സിന് നല്കി കഴിയുമ്പോള് വ്യക്തിയുടെ രജിസ്റ്റര് ചെയ്ത മൊബൈല് നമ്പറില്, സര്ട്ടിഫിക്കറ്റ് നമ്പര് അടങ്ങിയ എസ്എംഎസ് ലഭിക്കും. ഉടന് തന്നെ അവര്ക്ക് പോര്ട്ടലില് നിന്നും സര്ട്ടിഫിക്കറ്റ് ഡൗണ്ലോഡ് ചെയ്യാവുന്നതാണ്. കൂടുതല് വിവരങ്ങൾക്കും മറ്റും ദിശയടെ 1056, 104 എന്നീ നമ്പറുകളില് ബന്ധപ്പെടാം.
Most Read: എംപി മോഹൻ ദേൽക്കറുടെ ആത്മഹത്യ; പ്രഫുൽ പട്ടേലിനെതിരെ പരാതി