കോഴിക്കോട്: ഇനി മുതൽ കോഴിക്കോട് സൗത്ത് ബീച്ചിൽ എത്തുന്ന വിനോദ സഞ്ചാരികൾക്ക് നഗരത്തിന്റെ ചരിത്രം അറിയണമെങ്കിൽ ചുവരിലേക്ക് ഒന്ന് നോക്കിയാൽ മാത്രം മതി. സൗത്ത് ബീച്ചിലെ ചുവരിൽ കോഴിക്കോടിന്റെ ചരിത്രം പറയുന്ന ചുവർ ചിത്രങ്ങൾ ഒരുക്കിയിരിക്കുകയാണ് ഏഴ് കലാകാരൻമാർ. കെപി പ്രജീഷ്, കെസി ജയേഷ്, ഷിജു കട്ടാങ്ങൽ, പ്രബീഷ് ഇമ്പ്രലത്ത്, സ്നേഹ, ലാലു, സതീഷ് കുളങ്ങര എന്നിവരാണ് ചിത്രങ്ങൾ വരക്കുന്നത്.
കൈവണ്ടി വലിക്കുന്ന തൊഴിലാളി, സംഗീതം, രുചിക്കൂട്ട്, ബീച്ചിലെ ഉപ്പിലിട്ടത്, സൗത്ത് ബീച്ച്, വലിയങ്ങാടി, കുറ്റിച്ചിറ, ഗുജറാത്തി സ്ട്രീറ്റ് തുടങ്ങി കോഴിക്കോട് നഗരത്തിന്റെ എല്ലാ ആകർഷകങ്ങളും ഈ ചുവരിൽ ഇടംപിടിച്ചിട്ടുണ്ട്. യൂണിവേഴ്സൽ ആർട്സിൽ നിന്ന് പഠനം കഴിഞ്ഞ ഈ കലാകാരൻമാർ 23 വർഷത്തിനു ശേഷം ഒത്തു ചേർന്നപ്പോഴാണ് നഗരത്തിനു വേണ്ടി എന്തെങ്കിലും ചെയ്യണമെന്ന ആശയം മുന്നോട്ടുവച്ചത്.
തുടർന്ന് ജില്ലാ ടൂറിസം പ്രമോഷൻ കൗൺസിലിന്റെ സഹകരണത്തോടെ സൗത്ത് ബീച്ചിൽ ചുവർചിത്രം വരക്കാൻ കരാർ എടുക്കുകയായിരുന്നു. 10 ദിവസം മുൻപാണ് അവർ ചിത്രംവര ആരംഭിച്ചത്. പുലർച്ചെ അഞ്ചിന് ആരംഭിക്കുന്ന ചിത്രംവര വൈകിട്ട് 6.30നാണ് നിർത്താറ്. 3000 ചതുരശ്ര അടിയിലാണ് ചിത്രങ്ങൾ ഒരുക്കുന്നത്. ഇന്ന് ചിത്രംവര അവസാനിക്കും.
Malabar News: കുടിവെള്ള ക്ഷാമം; ബാണാസുര ഡാം തുറന്നു; ആശ്വാസം