ചെന്നൈ: തമിഴ്നാട്ടിൽ ഷവർമയിൽ നിന്ന് വിഷബാധയേറ്റ് മൂന്ന് വിദ്യാർഥികൾകൾ ആശുപത്രിയിൽ. തഞ്ചാവൂരിലെ ഒരത്തുനാട് സർക്കാർ വെറ്റിനറി കോളേജിലെ വിദ്യാർഥികൾക്കാണ് ഭക്ഷ്യ വിഷബാധയേറ്റത്. തഞ്ചാവൂർ മെഡിക്കൽ കോളേജിൽ ചികിൽസയിലാണ് വിദ്യാർഥികൾ. മൂന്ന് പേരുടേയും ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു.
പ്രവീൺ (22), പുതികോട്ട സ്വദേശി പരമേശ്വരൻ (21), ധർമപുരി സ്വദേശി മണികണ്ഠൻ (21) എന്നീ വിദ്യാർഥികളാണ് ഒരത്തുനാടുളള റെസ്റ്റോറന്റിൽ നിന്ന് ഷവർമ കഴിച്ചത്. ഹോസ്റ്റലിൽ തിരിച്ചെത്തിയ വിദ്യാർഥികൾക്ക് ഛർദ്ദിയും മറ്റ് അസ്വസ്ഥതകളും ഉണ്ടായതോടെ കോളേജ് അധികൃതർ ആശുപത്രിയിൽ പ്രവേശിപ്പിക്കുകയായിരുന്നു.
സംഭവത്തിൽ ഒരത്തുനാട് പോലീസ് കേസെടുത്ത് അന്വേഷണമാരംഭിച്ചു. വ്യാഴാഴ്ച മധുരയിലെ നിരവധി കടകളിൽ ഭക്ഷ്യസുരക്ഷാ സംഘം നടത്തിയ റെയ്ഡ് നടത്തിയിരുന്നു. ഇതിൽ അഞ്ച് കടകളിൽനിന്ന് 10 കിലോ പഴകിയ കോഴിയിറച്ചി പിടികൂടി. കേരളത്തിലെ കാസർഗോഡ് ഷവർമ കഴിച്ച് ഒരു വിദ്യാർഥിനി മരിച്ച സംഭവത്തെ തുടർന്ന് തമിഴ്നാട്ടിലും പരിശോധന നടപടികൾ ഊർജിതപ്പെടുത്തിയിരുന്നു.
Most Read: ‘ഒരു രാത്രിക്ക് 500’; ഓൺലൈൻ ലോണെടുത്ത യുവതിക്കെതിരെ അപകീർത്തി പ്രചാരണം, ഭീഷണി