മുംബൈ: രണ്ടാം ഘട്ട കോവിഡ് വ്യാപനം രൂക്ഷമായ മഹാരാഷ്‌ട്രയിൽ കോവിഡ് മാനദണ്ഡങ്ങൾ ലംഘിച്ച് ബോളിവുഡ് താരങ്ങൾ നിശാപാർട്ടി നടത്തിയെന്ന് പരാതി. ബോളിവുഡ് താരം മലൈക അറോറയുടെ സഹോദരിയും നടിയുമായ അമൃത അറോറയുടെ വീട്ടിൽ കഴിഞ്ഞ ദിവസം രാത്രി നടത്തിയ പാർട്ടിയാണ് വിവാദത്തിലായത്. സംഭവത്തിൽ പോലീസ് നടപടി സ്വീകരിക്കാനാണ് സാധ്യത.
അർജുൻ കപൂർ, കരൺ ജോഹർ, സീമ ഖാൻ, കരിഷ്‌മ കപൂർ, ഗൗതം ഖാൻ, മനീഷ് മൽഹോത്ര, സഞ്‌ജയ്‌ കപൂർ, മഹദീപ്, നടാഷ പൂനവാല തുടങ്ങിയവർ പാർട്ടിയിൽ പങ്കെടുത്തിരുന്നു. നിശാപാർട്ടിയുടെ ചിത്രങ്ങൾ സാമൂഹിക മാദ്ധ്യമങ്ങളിൽ പ്രചരിച്ചതോടെയാണ് സംഭവം വിവാദമായത്. സംഭവത്തിൽ വിവിധ സംഘടനകൾ ബോളിവുഡ് താരങ്ങൾക്ക് എതിരെ ഉയർത്തിയ പ്രതിഷേധത്തിന്റെ പശ്‌ചാത്തലത്തിലാണ് പോലീസ് ഇടപെടൽ.
വിഷയം പരിശോധിച്ച് വരികയാണെന്നും ഉചിതമായ നടപടി ഉടനുണ്ടാകുമെന്നും മുംബൈ പോലീസ് അറിയിച്ചു. കോവിഡ് രോഗവ്യാപനം രൂക്ഷമായതിന് പിന്നാലെ മുംബൈയിൽ സാമൂഹികമായ ഒത്തുചേരലുകൾക്ക് പോലീസ് നിരോധനം ഏർപ്പെടുത്തിയിരുന്നു. ഈ വിലക്കുകൾ ലംഘിച്ചാണ് താരങ്ങൾ ഒത്തുചേർന്നത്.
Read also: അതിതീവ്ര കോവിഡ് വൈറസ്; മഹാരാഷ്‌ട്രയിൽ 2 ജില്ലകളിൽ ലോക്ക്ഡൗൺ
