തിരുവനന്തപുരം: ജില്ലയിലെ സിഇടി എഞ്ചിനിയറിങ് കോളേജ് കോവിഡ് ക്ളസ്‌റ്ററായി. കഴിഞ്ഞ ഒരാഴ്‌ചക്കിടെ കോളേജിലെ 393 വിദ്യാർഥികൾക്കാണ് കോവിഡ് ബാധിച്ചത്. കൂടാതെ 2 വകുപ്പ് തലവൻമാർ അടക്കമുള്ള അധ്യാപകർക്കും രോഗബാധ ഉണ്ടായി. 35 ശതമാനമാണ് കോളേജിയിലെ നിലവിലെ ടെസ്‌റ്റ് പോസിറ്റിവിറ്റി നിരക്ക്.
കഴിഞ്ഞ ഒരാഴ്‌ചക്കിടെ ഇത്രയധികം പേർക്ക് രോഗബാധ ഉണ്ടായതോടെ കോളേജ് നിലവിൽ അടച്ചിട്ടിരിക്കുകയാണ്. ഓഫ്‌ലൈൻ ക്‌ളാസുകൾ ഒഴിവാക്കി ഓൺലൈൻ ക്‌ളാസുകളാണ് നിലവിൽ നടക്കുന്നത്. എന്നാൽ ഇതിനിടയിലും കോളേജിൽ പരീക്ഷകൾ നടക്കുന്നുണ്ട്. അധ്യാപകർക്കും മറ്റ് ജീവനക്കാർക്കും രോഗബാധ ഉണ്ടായതിനാൽ പരീക്ഷ നടത്തിപ്പ് ബുദ്ധിമുട്ടിലാണ്. ഈ സാഹചര്യത്തിൽ രണ്ടാഴ്‌ചത്തേക്കെങ്കിലും പരീക്ഷ മാറ്റിവെക്കണമെന്ന അപേക്ഷ സര്‍വകലാശാലയില്‍ നല്‍കി.
പരീക്ഷകൾ മാറ്റിവെക്കുന്നത് സംബന്ധിച്ച അന്തിമ തീരുമാനം എടുക്കേണ്ടത് സർവകലാശാലയാണ്. വിദ്യാർഥികളും പരീക്ഷ നടത്തുന്നതുമായി ബന്ധപ്പെട്ട ബുദ്ധിമുട്ട് അറിയിച്ചിട്ടുണ്ട്. വലിയ തോതിലുള്ള വ്യാപനമുണ്ടായ പശ്‌ചാത്തലത്തില്‍ പരീക്ഷകള്‍ മാറ്റിവയ്‌ക്കുമെന്നാണ് വിദ്യാര്‍ഥികളും അധ്യാപകരും പ്രതീക്ഷിക്കുന്നത്. കൂടാതെ ജില്ലയിൽ ഇതുവരെ 12 കോളേജുകളിലാണ് കോവിഡ് ക്ളസ്‌റ്റർ രൂപപ്പെട്ടിട്ടുള്ളത്.
Read also: രാജ്യത്ത് കോവിഡ് രൂക്ഷം; മാസ്‌ക് ധരിക്കാതെ കർണാടക മന്ത്രി
