ദുബായ്: കോവിഡ് കാലത്ത് ദുബായിലെ ജബൽഅലി ഏരിയയിൽ മികച്ച സന്നദ്ധ സേവനം ചെയ്ത മർകസ് വോളണ്ടിയർമാരെ ദുബായ് പോലീസ് ആദരിച്ചു. ജബൽഅലി പോലീസ് സ്റ്റേഷനിൽ നടന്ന ചടങ്ങിൽ ഇന്ത്യൻ ഗ്രാൻഡ് മുഫ്തി കാന്തപുരം എപി അബൂബക്കർ മുസ്ലിയാർ മുഖ്യാഥിതിയായി സംബന്ധിച്ചു.
സന്നദ്ധസേവന പ്രവർത്തകരുടെ കഠിനാധ്വാനവും ആത്മാർഥതയും കോവിഡ് മഹാമാരി വേളയിൽ ഞങ്ങൾക്ക് ബോധ്യപെട്ടതാണെന്നും അതുകൊണ്ടാണ് അവരെ ബഹുമാനിക്കുകയും ആദരിക്കുകയും ചെയ്യുന്നതെന്നും ബ്രിഗേഡിയർ ജനറൽ ഡോ ആദിൽ അൽ സുവൈദി പറഞ്ഞു. രാജ്യത്തിനെ വളരെ വേഗത്തിൽ സാധാരണ നിലയിലേക്ക് എത്തിക്കാൻ സാധിച്ചതിൽ സന്നദ്ധ സേവകരുടെ പ്രവർത്തനവും നിർണായകമായതായി അദ്ദേഹം വ്യക്തമാക്കി.
കോവിഡ് ഗുരുതരമായ സമയത്ത് ജബൽഅലി ഐസൊലേഷൻ സെന്ററിൽ മൂന്ന് ഷിഫ്റ്റിലായി 24 മണിക്കൂറും സന്നദ്ധസേവകർ പ്രവർത്തിച്ചു. ആവശ്യക്കാർക്ക് ഭക്ഷണവും മരുന്നും വിതരണം ചെയ്തും ലേബര് ക്യാംപുകളിലും സൂപ്പർ മാർക്കറ്റ് പോലുള്ള ആൾകൂട്ട സ്ഥലങ്ങളിൽ നേരിട്ടെത്തി ബോധവൽകരണം നടത്തിയും സുരക്ഷാ നിർദ്ദേശങ്ങളുടെ പോസ്റ്ററുകൾ പതിച്ചും സന്നദ്ധസേവകർ കോവിഡ് കാലത്ത് മാതൃകയായി.
ദിവസവും വതനി അൽ എമറാത്തി നൽകുന്ന നാൽപതിനായിരത്തിൽ അധികം ഭക്ഷണപ്പൊതികൾ വിതരണം ചെയ്തും മർകസ് ഐസിഎഫ്, ആർഎസ്സി വോളണ്ടിയർമാരും ഇതര മർകസ് പ്രവർത്തകരും ജബൽഅലിയുടെ എല്ലാ പ്രദേശങ്ങളിലും കർമ്മ നിരതരായിരുന്നതായും മർകസ് ഭാരവാഹികൾ അറിയിച്ചു.
ടീം ലീഡർ ലുക്മാൻ മങ്ങാട്, മുഹമ്മദ് അലി വയനാട്, സദഖതുല്ലാഹ് വളാഞ്ചേരി, ഷൗക്കത് മേപ്പറമ്പ്, റിയാസ് കുനിയിൽ, ശംസുദ്ധീൻ വൈലത്തൂർ, ബാദുഷ ഉദിനൂർ, ഫിറോസ് തറോൽ എന്നിവരെ ചടങ്ങിൽ ആദരിച്ചു. കോവിഡ് പ്രോട്ടോകോൾ കാരണം പങ്കെടുക്കാൻ കഴിയാതിരുന്ന വോളണ്ടിയർമാർക്കുള്ള പ്രശസ്തി പത്രങ്ങൾ ടീം ലീഡർ ലുക്മാൻ മങ്ങാടിന് ചടങ്ങിൽവച്ച് കൈമാറി. ഡപ്യൂട്ടി കേണൽ സുൽത്താൻ അൽ ഉവൈസ്, ലഫ്റ്റനന്റ് ഉമർ അൽ ഹമ്മാദി, മർകസ് പിആർ മാനേജർ ഡോ അബ്ദുൽസലാം സഖാഫി എന്നിവർ സംബന്ധിച്ചു.
Most Read: പ്രതിഷേധം പടരുന്നു; 50,000 കർഷകർ കൂടി ഡെൽഹിയിലേക്ക്