കോഴിക്കോട്: ബദ്‌റുല്‍ കുബ്‌റാ ആത്‌മീയ സമ്മേളനത്തിന്റെ ഭാഗമായി സംഘടിപ്പിച്ച ഗ്രാന്‍ഡ് ഇഫ്‌താറില്‍ പതിനായിരങ്ങള്‍ ഒരുമിച്ചിരുന്ന് നോമ്പ് തുറന്നു. സംസ്‌ഥാനത്തിനകത്ത് നിന്നും പുറത്ത് നിന്നും സമ്മേളനത്തിന് എത്തിയവരാണ് ജാമിഉല്‍ ഫുതൂഹ് ഇന്ത്യന്‍ ഗ്രാന്‍ഡ് മസ്‌ജിദിലും പരിസരത്തുമായി നോമ്പ് തുറന്നത്.
നോമ്പ് തുറക്ക് ആവശ്യമായ വിഭവങ്ങൾ ജനകീയ സമാഹരണത്തിലൂടെയാണ് സമാഹരിച്ചത്. ഇന്ത്യന്‍ ഗ്രാന്‍ഡ് മുഫ്‌തി കാന്തപുരം എപി അബൂബക്കര്‍ മുസ്‍ലിയാർ ഉൽഘാടനം ചെയ്‌ത സമ്മേളനത്തിൽ സമസ്‌ത പ്രസിഡണ്ട് ഇ സുലൈമാന്‍ മുസ്‍ലിയാർ അധ്യക്ഷത വഹിച്ചു.
സി മുഹമ്മദ് ഫൈസി, സയ്യിദ് ത്വാഹ സഖാഫി കുറ്റ്യാടി, ഹുസൈന്‍ സഖാഫി ചുള്ളിക്കോട്, ഡോ. മുഹമ്മദ് അബ്‌ദുൽ ഹകീം അസ്ഹരി, സുലൈമാന്‍ ഫൈസി കിഴിശ്ശേരി തുടങ്ങിയവര്‍ സംസാരിച്ചു. സയ്യിദ് അലി ബാഫഖീഹ്, സയ്യിദ് ശിഹാബുദ്ധീന്‍ അഹ്ദല്‍ മുത്തന്നൂര്‍, സയ്യിദ് ശിഹാബുദ്ധീന്‍ ബുഖാരി കടലുണ്ടി, സയ്യിദ് അബ്‌ദുറഹ്‌മാൻ ഇമ്പിച്ചിക്കോയ അല്‍ ബുഖാരി ബായാര്‍ എന്നിവർ സംബന്ധിച്ചു.
ഗ്രാന്‍ഡ് ഇഫ്‌താർ സമ്മേളനത്തിന്റെ ഭാഗമായി ബദ്‌രീയം, ബദര്‍ കിസ പാടിപ്പറയല്‍, മഹ്ളറത്തുല്‍ ബദ്രിയ്യ വാര്‍ഷിക സദസ്‌, പ്രാര്‍ഥനാ സംഗമം, അനുസ്‌മരണ പ്രഭാഷണം, അസ്‌മാഉൽ ബദ്ര്‍ പാരായണം, ബദര്‍ മൗലിദ് തുടങ്ങിയ ആത്‌മീയ പരിപാടികളും നടന്നു.
MOST READ | കെജ്‌രിവാളിന് ഇടക്കാല ആശ്വാസമില്ല; കേസ് ഏപ്രിൽ മൂന്നിന്
