ന്യൂഡെൽഹി: ആളോഹരി ജിഡിപിയിൽ ബംഗ്ളാദേശ് ഇന്ത്യയെ മറികടക്കുമെന്ന് രാജ്യാന്തര നാണയനിധി (ഐഎംഎഫ്). ഇന്ത്യയുടെ ജിഡിപിയിൽ 10.3% ഇടിവ് രേഖപ്പെടുത്തുമെന്ന് ഐഎംഎഫ് ചൊവ്വാഴ്ച പുറത്തുവിട്ട ‘വേൾഡ് ഇക്കണോമിക് ഔട്ട്ലുക്ക്’ റിപ്പോർട്ടിൽ സൂചിപ്പിച്ചിരുന്നു.
2021 മാർച്ച് 31 ന് സാമ്പത്തിക വർഷം അവസാനിക്കുമ്പോൾ ഇന്ത്യയുടെ ആളോഹരി ജിഡിപി 1877 യുഎസ് ഡോളറായി ഇടിയുമെന്നും ഐഎംഎഫ് പ്രവചിച്ചു. എന്നാൽ, 4.5% ഇടിവുണ്ടാകുമെന്ന് മാത്രമാണ് ഐഎംഎഫ് കഴിഞ്ഞ ജൂണിൽ റിപ്പോർട്ട് ചെയ്തിരുന്നത്. അതേസമയം ബംഗ്ളാദേശിന്റെ ആളോഹരി ജിഡിപി 1888 യുഎസ് ഡോളറായി വർധിക്കുമെന്നും ഇക്കണോമിക് ഔട്ട്ലുക് റിപ്പോർട്ടിലൂടെ ഐഎംഎഫ് പറയുന്നു.
Also Read: താന് വളര്ന്ന ഇന്ത്യയെ ഇന്ന് തിരിച്ചറിയാന് കഴിയില്ലെന്ന് ശശി തരൂർ
ആഗോളതലത്തിൽ ഇന്ത്യൻ സമ്പദ്വ്യവസ്ഥ ഈ വർഷം 4.4 ശതമാനമായി ചുരുങ്ങുമെന്നും 2021 ൽ 5.2 ശതമാനമായി വർധിക്കുമെന്നും റിപ്പോർട്ടിൽ ഐഎംഎഫ് ചൂണ്ടിക്കാട്ടി. നിലവിൽ ചൈനക്ക് 8.2% സാമ്പത്തിക വളർച്ചയാണ് റിപ്പോർട്ടിൽ പ്രഖ്യാപിച്ചിരിക്കുന്നത്. അടുത്ത വർഷത്തോടെ ഇതിനേയും മറികടന്നായിരിക്കും ഇന്ത്യയുടെ വളർച്ചയെന്നും ഐഎംഎഫ് സൂചിപ്പിച്ചു.