കണ്ണൂര്: കടവത്തൂരിനടുത്ത് മുക്കില് പീടികയില് വെട്ടേറ്റ ലീഗ് പ്രവര്ത്തകന് മരിച്ചു. ലീഗ്-സിപിഎം പ്രവര്ത്തകര് തമ്മിലുണ്ടായ സംഘര്ഷത്തില് വെട്ടേറ്റ ചൊക്ളി പുല്ലൂക്കര സ്വദേശി മന്സൂര് (22) ആണ് മരിച്ചത്.
സഹോദരന് മുഹ്സിന് പരിക്കേറ്റിരുന്നു. കോഴിക്കോട് സ്വകാര്യ ആശുപത്രിയില് ചികിൽസയിൽ ഇരിക്കെയാണ് മരണം. ഓപ്പണ് വോട്ടുമായി ബന്ധപ്പെട്ട തര്ക്കത്തിന് പിന്നാലെയാണ് മേഖലയില് സംഘര്ഷമുണ്ടായത്. വീട്ടിലേക്ക് മടങ്ങവേ ഒരു സംഘം സിപിഎം പ്രവര്ത്തകര് സംഘടിച്ചെത്തി ബോംബെറിഞ്ഞ് ഭീതി പരത്തിയതിന് ശേഷം ആക്രമിക്കുകയായിരുന്നു എന്നാണ് റിപ്പോർട്.
കഴിഞ്ഞ ദിവസം രാവിലെ മുതല് പ്രദേശത്ത് ചെറിയ രീതിയിലുളള സംഘര്ഷം ഉണ്ടായിരുന്നു. ഉച്ചക്ക് പന്ത്രണ്ടരയോടെ സംഘര്ഷം രൂക്ഷമായി. 149-150 എന്നീ രണ്ടുബൂത്തുകള്ക്ക് ഇടയിലായിരുന്നു പ്രശ്നം. 149ആം നമ്പര് ബൂത്തിലേക്ക് ഓപ്പണ് വോട്ട് ചെയ്യുന്നതിനായി വോട്ടര്മാരെ കൊണ്ടുവരുന്നതുമായി ബന്ധപ്പെട്ടായിരുന്നു തര്ക്കം.
വോട്ടെടുപ്പ് തീര്ന്നതോടെ തര്ക്കം അവസാനിച്ചെന്ന് കരുതിയെങ്കിലും രാത്രി ഏഴരയോടെ വീണ്ടും സംഘര്ഷം ഉണ്ടാവുകയായിരുന്നു. രാത്രിയോടെ ഒളിച്ചിരുന്ന ഒരുസംഘം ആളുകള് മന്സൂര് വീട്ടില് നിന്ന് പുറത്തിറങ്ങുന്ന സമയം നോക്കി ബോംബ് എറിഞ്ഞ് ഭീതി പരത്തിയ ശേഷം വെട്ടി പരിക്കേല്പ്പിക്കുക ആയിരുന്നു.
ഗുരുതരമായി പരിക്കേറ്റ മന്സൂറിനേയും സഹോദരനേയും ആദ്യം തലശ്ശേരി ഇന്ദിരാഗാന്ധി ആശുപത്രിയിലാണ് പ്രവേശിപ്പിച്ചത്. പിന്നീട് കോഴിക്കോട്ടെ സ്വകാര്യ ആശുപത്രിയിലേക്ക് മാറ്റുകയായിരുന്നു. രാത്രി ഒരുമണിയോടെയാണ് മന്സൂറിന്റെ മരണം സ്ഥിരീകരിച്ചത്.
Also Read: ഇന്ധന വിലവർധനയിൽ പ്രതിഷേധം; വോട്ട് ചെയ്യാൻ സൈക്കിളിൽ എത്തി യുവ ഡോക്ടർ
