കുണ്ടംകുഴി: പ്രായപൂർത്തിയാകാത്ത മകൻ ബൈക്ക് ഓടിച്ചതിന് വാഹന ഉടമയായ അമ്മക്ക് ഒരു ദിവസത്തെ തടവുശിക്ഷ. ഇതിന് പുറമെ കാൽ ലക്ഷം രൂപ പിഴയും ചുമത്തണമെന്ന് കോടതി വിധി. കുണ്ടംകുഴി വേളാഴി സ്വദേശിയായ വിദ്യാർഥിയുടെ മാതാവിനാണ് ശിക്ഷ ലഭിച്ചത്. വിദ്യാർഥി 1000 രൂപയും പിഴയടക്കണം.
2020 മാർച്ച് 17നാണ്‌ കേസിന് ആസ്‌പദമായ സംഭവം നടക്കുന്നത്. കുണ്ടംകുഴി മാവിനക്കല്ല് പ്രദേശത്ത് വാഹന പരിശോധനക്കിടെ വിദ്യാർഥിയെ പോലീസ് പിടികൂടുയായിരുന്നു. കുട്ടിക്ക് പ്രായപൂർത്തി ആകാത്തതിനാൽ ആർസി ഉടമയായ അമ്മക്കെതിരെയാണ് കേസെടുത്തത്. ബേഡകം പോലീസാണ് കേസെടുത്തത്. പ്രായപൂർത്തിയാകാത്ത കുട്ടിക്ക് അറിവോട് കൂടി വാഹനം നൽകിയതിനാണ് അമ്മക്ക് 25,000 രൂപ പിഴയും കോടതി പിരിയുന്നത് വരെ തടവും വിധിച്ചത്. കാസർഗോഡ് ഒന്നാം ക്‌ളാസ് ജുഡീഷ്യൽ കോടതിയുടേതാണ് ഉത്തരവ്.
Also Read: കോവിഡ്; രാജ്യത്തെ 150 ജില്ലകളിൽ ലോക്ക്ഡൗൺ ഏർപ്പെടുത്തണമെന്ന് കേന്ദ്രം
