തിരുവനന്തപുരം: അടുത്ത സാമ്പത്തിക വര്ഷം അവസാനിക്കുന്നതിന് മുമ്പ് സംസ്ഥാനത്തെ എല്ലാ അങ്കണവാടികള്ക്കും സ്വന്തമായി കെട്ടിടം സാധ്യമാക്കാനാണ് ലക്ഷ്യമിടുന്നതെന്ന് ആരോഗ്യ- വനിത ശിശുവികസന വകുപ്പ് മന്ത്രി വീണാ ജോര്ജ്. പൂജപ്പുരയില് സംസ്ഥാനത്തെ ആദ്യത്തെ സ്മാര്ട്ട് അങ്കണവാടി കെട്ടിടം ഉൽഘാടനം ചെയ്ത് സംസാരിക്കുകയായിരുന്നു മന്ത്രി.
സംസ്ഥാനത്തെ 33,115 അങ്കണവാടികളില് 24,360 അങ്കണവാടികള് സ്വന്തം കെട്ടിടത്തിലും 6498 അങ്കണവാടികള് വാടക കെട്ടിടത്തിലുമാണ് പ്രവര്ത്തിക്കുന്നത്. ഈ വര്ഷത്തോടെ തന്നെ എല്ലാ അങ്കണവാടികളും വൈദ്യുതിവൽക്കരിക്കുമെന്നും മന്ത്രി വ്യക്തമാക്കി.
പൊതു വിദ്യാഭ്യാസ രംഗത്ത് വിപ്ളവാത്മകമായ മാറ്റങ്ങളാണ് നടത്തിയത്. അക്കാഡമിക് സൗകര്യങ്ങളും അടിസ്ഥാന സൗകര്യങ്ങളും വികസിപ്പിച്ചു. ഒന്നാം ക്ളാസിന് മുമ്പ് കുട്ടികള് എത്തുന്ന ഇടമാണ് അങ്കണവാടികള്. അതനുസരിച്ച് അങ്കണവാടികളുടെ അടിസ്ഥാന സൗകര്യത്തിലും കരിക്കുലത്തിലും വലിയ മാറ്റങ്ങള് വരുത്തി; മന്ത്രി പറഞ്ഞു.
155 സ്മാര്ട്ട് അങ്കണവാടി കെട്ടിടങ്ങള്ക്ക് നിര്മാണാനുമതി നല്കിയിട്ടുണ്ടെന്നും അവയുടെ നിര്മാണം വിവിധ ഘട്ടങ്ങളിലായി പുരോഗമിച്ചു വരികയാണെന്നും മന്ത്രി അറിയിച്ചു. സ്ഥല പരിമിതി അനുസരിച്ച് 10, 7, 5 സെന്റുകള് വീതമനുസരിച്ചാണ് മോഡല് അങ്കണവാടികള് രൂപകൽപന ചെയ്തിരിക്കുന്നത്. അങ്കണവാടി കരിക്കുലം ജെന്ഡര് ഓഡിറ്റിംഗ് നടത്തി പരിഷ്ക്കരിച്ച് ലിംഗ സമത്വം ഉറപ്പാക്കാന് നടപടി സ്വീകരിച്ചിട്ടുണ്ടെന്നും മന്ത്രി പറഞ്ഞു.
‘കുഞ്ഞുങ്ങളുടെ ഭാവിയുടെ സമഗ്ര വികാസം ഉറപ്പാക്കിയാണ് സ്മാര്ട്ട് അങ്കണവാടികള്ക്ക് രൂപകൽപന ചെയ്തിരിക്കുന്നത്. പഠനമുറി, വിശ്രമമുറി, ഭക്ഷണ മുറി, അടുക്കള, സ്റ്റോര് റൂം, ഇന്ഡോര് ഔട്ട്ഡോര് പ്ളേ ഏരിയ, ഹാള്, പൂന്തോട്ടം തുടങ്ങിയ എല്ലാ സൗകര്യങ്ങളുമുണ്ടാകും. 6 മാസത്തിനുള്ളില് സമയ ബന്ധിതമായി ഈ സ്മാര്ട്ട് അങ്കണവാടികള് പൂര്ത്തിയാക്കാന് നടപടി സ്വീകരിക്കും’, മന്ത്രി വ്യക്തമാക്കി.
ചടങ്ങില് വിദ്യാഭ്യാസ വകുപ്പ് മന്ത്രി വി ശിവന് കുട്ടി അധ്യക്ഷത വഹിച്ചു. കുട്ടികള്ക്ക് മെച്ചപ്പെട്ട പഠനാനുഭവം നല്കാനാണ് ലക്ഷ്യമിടുന്നതെന്ന് അദ്ദേഹം പറഞ്ഞു. 10 ലക്ഷം വിദ്യാര്ഥികള് പൊതു വിദ്യാഭ്യാസ രംഗത്ത് എത്തിയത് വലിയ കാര്യമാണ്. കുട്ടികളുടെ മാനസികവും ബൗദ്ധികവുമായ വികാസത്തിന് സ്മാര്ട്ട് അങ്കണവാടികള് സഹായിക്കും. ശാരീരികവും മാനസികവുമായ ഉല്ലാസത്തിനും സ്മാര്ട്ട് അങ്കണവാടികള് സഹായിക്കുമെന്നും മന്ത്രി പറഞ്ഞു.
Most Read: ഭീമ കൊറഗാവ് കേസ്; വരവരറാവു അടക്കം മൂന്നുപേര്ക്ക് ജാമ്യമില്ല