കണ്ണൂർ: ആലപ്പുഴയിലെ കൊലപാതകങ്ങളുടെ പശ്ചാത്തലത്തിൽ കണ്ണൂരിലും കനത്ത സുരക്ഷ ഒരുക്കി പോലീസ്. ജില്ലയിലെ രാഷ്ട്രീയ പാർട്ടികളുടെ ആസ്ഥാന മന്ദിരങ്ങൾ പോലീസ് നിരീക്ഷണത്തിലാക്കി. പാർട്ടി ഓഫീസുകളുടെ പരിസരത്ത് പാർട്ടിയുമായി ബന്ധമില്ലാതെ കറങ്ങുന്നവരെ പോലീസ് കസ്റ്റഡിയിൽ എടുക്കും. കണ്ണൂരിൽ രാത്രികാലങ്ങളിൽ അനാവശ്യമായി കറങ്ങി നടക്കുന്നവരെയും പിടികൂടും.
വ്യക്തമായ കാരണങ്ങൾ ഇല്ലാതെ നഗരത്തിൽ ചുറ്റുന്നവർക്കാണ് പോലീസിന്റെ പിടിവീഴുക. ഇന്നലെ മുതലാണ് ജില്ലയിൽ പോലീസ് രാത്രികാല പട്രോളിങ് ശക്തമാക്കിയത്. ആലപ്പുഴയിൽ ഉണ്ടായ ഇരട്ടകൊലപാതകങ്ങളുടെ സാഹചര്യത്തിൽ കണ്ണൂരിലും പ്രശ്നങ്ങൾ ഉണ്ടാകുമെന്ന സാധ്യത കണക്കിലെടുത്താണ് പോലീസ് പരിശോധന ശക്തമാക്കിയത്. ഇന്നലെ കണ്ണൂർ ടൗൺ സ്റ്റേഷൻ പരിധിയിൽ മാത്രം പത്ത് പേർക്കെതിരെ മുൻകരുതൽ അറസ്റ്റ് രേഖപ്പെടുത്തി. 27 വാഹനങ്ങളും പിടിച്ചെടുത്തു.
രാത്രി പത്തിന് ശേഷം അനാവശ്യമായി കറങ്ങുന്ന വാഹനങ്ങൾ പോലീസ് പിടിച്ചെടുക്കും. ടൗണുകളിൽ രാത്രി പത്ത് കഴിഞ്ഞാൽ കൂട്ടംകൂടി നിൽക്കുന്നവർക്കെതിരെ നടപടിയെടുക്കും. കൂടാതെ, രാഷ്ട്രീയ ആക്രമണ കേസുകളിൽ ഉൾപ്പെട്ടവരെ കുറിച്ചുള്ള വിവരങ്ങൾ ശേഖരിക്കാനും നിരീക്ഷണം ഏർപ്പെടുത്താനും അതത് സ്റ്റേഷൻ ഹൗസ് ഓഫിസർമാർക്ക് സിറ്റി റൂറൽ പോലീസ് മേധാവിമാർ നിർദ്ദേശം നൽകി.
Most Read: ഗോവയിൽ കോൺഗ്രസിന് തിരിച്ചടി; എംഎൽഎ രാജിവച്ചു