ദോഹ: എയർലൈൻ റേറ്റിങ്സിന്റെ ഈ വർഷത്തെ ‘എയർലൈൻ ഓഫ് ദി ഇയർ‘ പുരസ്‌കാരം സ്വന്തമാക്കി ഖത്തർ എയർവേയ്‌സ്. ഖത്തർ എയർവേയ്‌സിന്റെ ബിസിനസ് ക്‌ളാസിന്റെ പ്രത്യേകതയായ ക്യൂ സ്യൂട്ട് ആണ് പുരസ്‌കാരത്തിന് അർഹമാക്കിയത്. വ്യോമ മേഖലയിൽ മധ്യപൂർവ ദേശത്തെ മികച്ച എയർലൈൻ, മികച്ച കേറ്ററിങ്, മികച്ച ബിസിനസ് ക്‌ളാസ് എന്നിങ്ങനെ മൂന്ന് പുരസ്‌ക്കാരങ്ങൾ കൂടി ഖത്തർ എയർവേയ്‌സിന് ലഭിച്ചു.
ആഗോള തലത്തിൽ 140ൽ കൂടുതൽ നഗരങ്ങളിൽ ഖത്തർ എയർവേയ്‌സ് സർവീസ് നടത്തുന്നുണ്ട്. കോവിഡ് പ്രതിസന്ധിയിലും തടസമില്ലാത്ത യാത്രാ, കാർഗോ സേവനങ്ങൾ തുടരുകയാണ് ഖത്തർ എയർവേയ്‌സ്.
അതേസമയം, അടുത്ത രണ്ടു മാസത്തിനുള്ളിൽ എയർബസ്, ബോയിങ് കമ്പനികളുടെ പുതിയ കാർഗോ വിമാനങ്ങൾ വാങ്ങുമെന്ന് ഖത്തർ എയർവേയ്‌സ് അറിയിച്ചു. പുതിയ മോഡലുകൾ ലഭ്യമാകുന്നതനുസരിച്ച് ബോയിങ് അല്ലെങ്കിൽ എയർബസിന്റെ കാർഗോ വിമാനങ്ങൾക്കായി ഈ വർഷം തന്നെ ഓർഡർ നൽകുമെന്ന് ഫ്‌ളൈറ്റ് പ്ളാൻ-3 വെബിനാറിൽ പങ്കെടുക്കവെ ഖത്തർ എയർവേയ്‌സ് സിഇഒ അക്ബർ അൽ ബേക്കർ പറഞ്ഞതായാണ് റിപ്പോർട്.
Most Read: സഞ്ചാരികളിൽ അൽഭുതം നിറച്ച് രാത്രിയിൽ തിളങ്ങുന്ന ബീച്ച്!
