പത്തനംതിട്ട: ശബരിമല ഡ്യൂട്ടിയിലുള്ള പോലീസുകാരുടെ സൗജന്യ മെസ് സൗകര്യം റദ്ദാക്കി. കോവിഡ് പ്രതിസന്ധിയെ തുടർന്ന് ദേവസ്വം ബോർഡിൽ നിന്ന് മെസ് സബ്‌സിഡി ലഭിച്ചില്ലെന്ന് ചൂണ്ടിക്കാട്ടിയാണ് നടപടി. ഇത് സംബന്ധിച്ച ഉത്തരവ് മെസ് ഓഫീസർ പുറത്തിറക്കിയിട്ടുണ്ട്.
ശബരിമല തീർഥാടന കാലത്ത് ഡ്യൂട്ടിയിലുള്ള പോലീസുകാർക്ക് ഏറെ ആശ്വാസമായിരുന്നു സൗജന്യ മെസ് സൗകര്യം. 2011 മുതൽ 2019 വരെ പോലീസിന്റെ മെസിന് സർക്കാർ നേരിട്ടാണ് സബ്‌സിഡി നൽകിയിരുന്നത്. സന്നിധാനം, പമ്പ, നിലക്കൽ, എരുമേലി, മണിയാർ എന്നിവിടങ്ങളുണ്ടായിരുന്ന സൗജന്യ ഭക്ഷണശാല സംവിധാനമാണ് നിർത്തലാക്കിയത്. ഇതോടെ ഭക്ഷണത്തിനുള്ള തുക സേനാംഗങ്ങൾ തന്നെ നൽകേണ്ടി വരും.
Also Read: പാലാരിവട്ടം അഴിമതി കേസ്; ഇബ്രാഹിം കുഞ്ഞ് അറസ്‌റ്റിൽ
സൗജന്യ മെസ് 2011ൽ ആദ്യമായി അനുവദിച്ചപ്പോൾ 85 ലക്ഷം രൂപയായിരുന്നു സബ്‌സിഡി. 2019ൽ ഇത് ഒരു കോടി രൂപയോളമായി ഉയർത്തുകയും ചെയ്‌തിരുന്നു. കോവിഡിന്റെ പേരിൽ മെസ് നിർത്തലാക്കിയതിൽ പോലീസ് സേനക്കുള്ളിൽ നിന്ന് തന്നെ വിമർശനങ്ങൾ ഉയരുന്നുണ്ട്.
