ന്യൂഡെൽഹി: രാജ്യത്തെ കറൻസി നോട്ടുകളിൽ മഹാത്‌മാ ഗാന്ധിയുടെ ചിത്രത്തിന് പുറമേ രബീന്ദ്രനാഥ് ടഗോർ, എപിജെ അബ്‌ദുൽ കലാം എന്നിരുടെ ചിത്രങ്ങൾ കൂടി ഉൾപ്പെടുത്താൻ ആലോചനകൾ നടക്കുന്നതായി റിപ്പോർട്. ഇതുമായി ബന്ധപ്പെട്ട് റിസർവ് ബാങ്ക് ഓഫ് ഇന്ത്യ ആലോചനകൾ നടത്തി വരികയാണെന്ന് ദേശീയ മാദ്ധ്യമങ്ങൾ റിപ്പോർട് ചെയ്‌തു. ഗാന്ധിജിയെ കൂടാതെ മറ്റ് പ്രമുഖരെയും നോട്ടുകളിൽ ഉൾപ്പെടുത്താൻ ആലോചിക്കുന്നത് ഇതാദ്യമാണ്.
ആർബിഐയും ധനമന്ത്രാലയത്തിന് കീഴിലുള്ള സെക്യൂരിറ്റി പ്രിന്റിങ് ആൻഡ് മിന്റിങ് കോർപ്പറേഷൻ ഓഫ് ഇന്ത്യയും ഗാന്ധിജി, ടഗോർ, കലാം എന്നിവരുടെ വാട്ടർമാർക്കുകളുടെ രണ്ടു വ്യത്യസ്‌ത സെറ്റ് സാമ്പിളുകൾ തയ്യാറാക്കിയിട്ടുണ്ട്. ഇത് കൂടുതൽ പരിശോധനക്കായി അയച്ചിരിക്കുകയാണ്. അധികം വൈകാതെ തന്നെ ഇക്കാര്യത്തിൽ അന്തിമ തീരുമാനം ഉണ്ടാകുമെന്നാണ് സൂചന.
Read Also: രാജ്യസഭാ തിരഞ്ഞെടുപ്പ്; സംസ്‌ഥാനങ്ങളിലേക്ക് നിരീക്ഷകരെ അയച്ച് എഐസിസി
