തിരുവനന്തപുരം: ബിജെപി സംസ്‌ഥാന കമ്മിറ്റി ഓഫിസില്‍ ദേശീയ പതാക ആദ്യം ഉയര്‍ത്തിയത് തലതിരിഞ്ഞ്. ബിജെപി സംസ്‌ഥാന അധ്യക്ഷന്‍ കെ സുരേന്ദ്രനാണ് പതാക തെറ്റായ രീതിയിൽ ഉയര്‍ത്തിയത്.
എന്നാൽ അബദ്ധം മനസിലാക്കിയ ഉടന്‍ ബിജെപി നേതാവ് തിരുത്തി. അതേസമയം കയര്‍ കുരുങ്ങിയതുകൊണ്ട് സംഭവിച്ചതാണ് എന്നാണ് നേതാക്കളുടെ വിശദീകരണം.
പതാക പകുതി ഉയര്‍ത്തി ‘ഭാരത് മാതാ കി’ എന്ന മുദ്രാവാക്യം വിളിക്കാൻ തുടങ്ങിയപ്പോഴാണ് പതാക തല തിരിഞ്ഞാണ് ഉയർത്തുന്നതെന്ന കാര്യം ബോധ്യമായത്. അമളി പറ്റിയെന്ന് കണ്ടെത്തിയതോടെ പതാക തിരിച്ച് ഇറക്കുകയായിരുന്നു. ബിജെപി നേതാവ് ഒ രാജഗോപാലും ചടങ്ങില്‍ പങ്കെടുത്തിരുന്നു.
പാര്‍ട്ടി ആസ്‌ഥാനത്ത് നടന്ന ചടങ്ങിന്റെ ചിത്രങ്ങള്‍ സുരേന്ദ്രന്‍ സമൂഹ മാദ്ധ്യമങ്ങളിൽ പങ്കുവച്ചിട്ടുണ്ട്. സ്വാതന്ത്ര്യ സമരസേനാനിയും മുതിര്‍ന്ന ബിജെപി നേതാവുമായ അയ്യപ്പന്‍ പിള്ളയെ ആദരിക്കുകയും ചെയ്‌തു. അതേസമയം ദേശീയ പതാക തലകീഴായി ഉയര്‍ത്തിയതില്‍ കെ സുരേന്ദ്രനെതിരെ വ്യാപകമായ വിമര്‍ശനങ്ങളാണ് ഉയരുന്നത്.
Most Read: ‘സ്വാതന്ത്ര്യസമര മൂല്യങ്ങൾ അറിയില്ല’; സുധാകരന് മറുപടിയുമായി എ വിജയരാഘവൻ
