ന്യൂഡെൽഹി: കേന്ദ്ര സർക്കാരിന്റെ വിവാദ കാർഷിക നിയമങ്ങൾക്ക് എതിരെ ഡെൽഹി അതിർത്തിയിൽ നടക്കുന്ന കർഷക പ്രക്ഷോഭത്തിന് നേതൃത്വം നൽകുകയും മാസങ്ങളായി സമരം ഇരിക്കുകയും ചെയ്യുന്ന സ്ത്രീകളെ ആദരിച്ച് ടൈം മാഗസിൻ. കർഷക പ്രക്ഷോഭത്തിൽ അണിനിരക്കുന്ന സ്ത്രീകളുടെ ചിത്രം കവർ ഫോട്ടോ ആയി നൽകിയാണ് ടൈം മാഗസിൻ ആദരം പ്രകടിപ്പിച്ചത്.
ചില വനിതാ കർഷകർ തങ്ങളുടെ കൊച്ചുകുട്ടികളെ കൈയ്യിൽ എടുത്ത് മുദ്രാവാക്യം വിളിക്കുന്നതാണ് കവർ ചിത്രം. ചിത്രത്തിൽ വൃദ്ധരായ സ്ത്രീകളെയും കാണാം. കർഷക പ്രക്ഷോഭം 100 ദിനങ്ങൾ പിന്നിടുന്ന ദിവസം തന്നെയാണ് ഈ ആഗോള തലത്തിൽ ശ്രദ്ധേയമായ ടൈം മാഗസിൻ സ്ത്രീ കരുത്തിന് അഭിവാദ്യം അർപ്പിച്ച് കവർ ചിത്രം ഒരുക്കിയിരിക്കുന്നത്.
TIME’s new international cover: “I cannot be intimidated. I cannot be bought.” The women leading India’s farmers’ protests https://t.co/o0IWwWkXHR pic.twitter.com/3TbTvnwiOV
— TIME (@TIME) March 5, 2021
“എന്നെ ഭയപ്പെടുത്താൻ കഴിയില്ല, എന്നെ വിലക്കു വാങ്ങാൻ കഴിയില്ല”- എന്ന തലക്കെട്ടിലാണ് ലേഖനം. സ്ത്രീകളോട് നാട്ടിലേക്ക് മടങ്ങാൻ സർക്കാർ ആവശ്യപ്പെട്ടപ്പോൾ അവരുടെ പ്രക്ഷോഭം തുടരാൻ വനിതാ കർഷകർ തീരുമാനിച്ചതിനെ കുറിച്ച് ടൈം മാഗസിൻ ലേഖനം പറയുന്നു. പഞ്ചാബിൽ നിന്നും ഹരിയാനയിൽ നിന്നും ഉത്തർപ്രദേശിൽ നിന്നുമുള്ള ആയിരക്കണക്കിന് കർഷകർക്ക് വഴിയൊരുക്കാനുള്ള പ്രക്ഷോഭത്തിന്റെ ചുമതല ഈ സ്ത്രീകൾ ഏറ്റെടുക്കുക ആയിരുന്നു.
Also Read: ഇന്ത്യ സ്വതന്ത്ര രാജ്യമല്ലെന്ന ഫ്രീഡം ഹൗസ് റിപ്പോർട്; നാണക്കേടെന്ന് ശശി തരൂര്