പനജി: കോവിഡ് സ്ഥിരീകരിച്ചിട്ടും ഗ്ലൗസ് ഇടാതെ ഫയലുകൾ നോക്കുന്ന ഗോവ മുഖ്യമന്ത്രി പ്രമോദ് സാവന്തിനെതിരെ രൂക്ഷ വിമർശനമുയരുന്നു. ‘കോവിഡ് പോസിറ്റീവ് ആയിട്ടും വിശ്രമമില്ലാതെ ഉത്തരവാദിത്വം നിറവേറ്റുന്ന മുഖ്യമന്ത്രിയെ നോക്കൂ’ എന്ന കുറിപ്പോടെയാണ് മുഖ്യമന്ത്രിയുടെ ഓഫീസിന്റെ ഔദ്യോഗിക ട്വിറ്റർ ഹാൻഡിലിലൂടെ പ്രമോദ് സാവന്തിന്റെ ചിത്രം പങ്കുവച്ചത്. ഇതിനു പിന്നാലെയാണ് വ്യാപക വിമർശനമുയർന്നത്.
കോവിഡ് സ്ഥിരീകരിച്ച വ്യക്തി കയ്യിൽ ഗ്ലൗസ് ഇടാതെ നോക്കിയ ഫയൽ പിന്നീട് മറ്റ് ഉദ്യോഗസ്ഥർക്ക് കൈമാറുമ്പോൾ അവർക്ക് രോഗം പകരില്ലേ എന്നാണ് കോൺഗ്രസ് നേതാക്കളുടെ ചോദ്യം. കോവിഡ് ബാധിതനായിട്ടും കർമനിരതനാണെന്ന് അവകാശപ്പെടുന്ന മുഖ്യമന്ത്രി യഥാർത്ഥത്തിൽ രോഗം പരത്തുകയാണെന്ന് ഗോവ പ്രദേശ് കോൺഗ്രസ് കമ്മിറ്റി പ്രസിഡന്റ് ഗിരീഷ് ചോഡങ്കർ ആരോപിച്ചു.
ഗ്ലൗസ് ധരിക്കാതെയാണ് അദ്ദേഹം ഫയലുകൾ നോക്കുന്നത്. ഈ ഫയലുകൾ ഉപയോഗിക്കുന്ന സർക്കാർ ഉദ്യോഗസ്ഥർക്ക് കോവിഡ് ബാധിച്ചാലും അതിശയമില്ലെന്ന് ചോഡങ്കർ പറഞ്ഞു.
സെപ്തംബർ രണ്ടിന് കോവിഡ് സ്ഥിരീകരിച്ച മുഖ്യമന്ത്രി ഇപ്പോൾ വീട്ടിൽ നിരീക്ഷണത്തിൽ തുടരുകയാണ്.
