മലപ്പുറം: ജില്ലയിലെ കരുളായിയിൽ നടന്ന നബിദിന ആഘോഷത്തോട് അനുബന്ധമായി പ്രദേശത്തെ മുതിർന്ന പോസ്റ്റുമാൻമാരെ ആദരിച്ച് കേരള മുസ്ലിം ജമാഅത്ത് സർക്കിൾ കമ്മിറ്റിയും മദാറുദ്ദഅ്വ്വത്തിൽ ഇസ്ലാമിയഃയും.
ഒക്ടോബർ 9ആയ ഇന്ന്, നബിദിനവും ലോക തപാൽ ദിനവും ഒന്നിച്ചാണ് കടന്നുവന്നത്. ഈ ഓർമ നിലനിർത്താനാണ് ഇന്നേ ദിവസം മുതിർന്ന തപാൽ ഉദ്യോഗസ്ഥരെ ആദരിക്കാൻ തീരുമാനിച്ചത്. എംഡിഐ (മദാറുദ്ദഅ്വ്വത്തിൽ ഇസ്ലാമിയഃ) രജതജൂബിലി സമ്മേളന സംഘാടകരും കേരള മുസ്ലിം ജമാഅത്ത് സർക്കിൾ കമ്മിറ്റിയും സംയുക്തമായാണ് ആദരിക്കൽ സംഘടിപ്പിച്ചത്.
മദാറുദ്ദഅ്വ്വത്തിൽ ഇസ്ലാമിയഃ കാംപസ് മസ്ജിദിൽ വെച്ചാണ് ഇരുവരെയും ആദരിച്ചത്. തപാൽ വകുപ്പിൽ പോസ്റ്റ്മാനായി 36 വർഷത്തിലധികമായി സേവനം ചെയ്യുന്ന കെപി രവീന്ദ്രൻ, ഇതേ പോസ്റ്റോഫീസിൽ നിന്ന് ഈ അടുത്ത നാളുകളിൽ വിരമിച്ച എംകെ മോഹൻദാസ് കാർളിക്കോട് എന്നിവരെയാണ് എംഡിഐ ജനറൽ സെക്രട്ടറി കെ ശൗക്കത്തലി സഖാഫി പൊന്നാടയണിയിച്ചത്.
‘ആഘോഷങ്ങൾ മാനവീക സൗഹൃദ ബന്ധങ്ങൾ ശക്തിപ്പെടുത്താനാകണം. നാട്ടിലെ എല്ലാ വിഭാഗം ജനങ്ങളുമായും നിരന്തരം സമ്പർക്കമുള്ള ഇത്തരം ആളുകളുടെ സേവനം വിദ്വേഷ കാലത്ത് ഏറെ ആശ്വാസകരമാണ്‘ -ചടങ്ങിൽ സന്ദേശ പ്രസംഗം നടത്തിയ കേരള മുസ്ലിം ജമാഅത്ത് ജില്ലാ സെക്രട്ടറി കെപി ജമാൽ കരുളായി പറഞ്ഞു.
സയ്യിദ് ഫള്ൽ ജിഫ്രി കുണ്ടൂർ, അബ്ദുള്ളക്കോയ തങ്ങൾ, എംഡിഐ പ്രസിഡന്റ് എം അബു മുസ്ലിയാർ, പികെ ഉസ്മാൻ, എം അബ്ദുൽ ഖാദർ മുസ്ലിയാർ, സികെ റശീദ് മുസ്ലിയാർ, പിഎച്ച് അലവിക്കുട്ടി സഖാഫി, പി. കോമു മൗലവി, അസീസ് മുസ്ലിയാർ, കെടി സിദ്ധീഖ് സഖാഫി എന്നിവർ ചടങ്ങിൽ സംബന്ധിച്ചു.
Most Read: ഉൾകാഴ്ചയുടെ നിലവിളക്കുമായി നബിദിന ഘോഷയാത്രയെ സ്വീകരിച്ച് ക്ഷേത്രസമിതി