കൊച്ചി: കേരളത്തിലും ആം ആദ്മി സര്ക്കാര് രൂപീകരിക്കുമെന്ന് ഡെൽഹി മുഖ്യമന്ത്രി അരവിന്ദ് കെജ്രിവാള്. കിഴക്കമ്പലത്ത് ട്വന്റി ട്വന്റി- ആം ആദ്മി സഖ്യപ്രഖ്യാപനം നടത്തി സംസാരിക്കവേയാണ് ഡെൽഹി മുഖ്യമന്ത്രിയുടെ പ്രസ്താവന. ആം ആദ്മിയുടെ വളര്ച്ച അതിവേഗമായിരുന്നു എന്നും പഞ്ചാബില് അധികാരത്തിൽ എത്തിയതിന് പിന്നിൽ സത്യസന്ധത മാത്രമാണെന്നും കെജ്രിവാൾ ചൂണ്ടിക്കാട്ടി.
‘വൈദ്യുതി സൗജന്യം, മികവുറ്റ സര്ക്കാര് സ്കൂളുകള്, അഴിമതിയില്ലാതാക്കി. കേരളത്തിലും സൗജന്യ വൈദ്യുതി വേണ്ടേ?’; കിഴക്കമ്പലത്ത് ചടങ്ങിന് സാക്ഷ്യം വഹിച്ച ജനങ്ങളോട് കെജ്രിവാൾ ചോദിച്ചു. മലയാളത്തില് നമസ്കാരം പറഞ്ഞ ശേഷം ഹിന്ദിയിലാണ് അദ്ദേഹം സംസാരിച്ചത്. ഇന്ന് വൈകീട്ട് അഞ്ചുമുതല് കിഴക്കമ്പലത്തെ കിറ്റക്സ് ഗ്രൗണ്ടിലാണ് പരിപാടി നടന്നത്.
തൃക്കാക്കരയിൽ ട്വന്റി-20 യുമായി യോജിച്ച് സംയുക്ത സ്ഥാനാർഥിയെ നിർത്താൻ ധാരണയായെന്ന സൂചന ഉണ്ടായിരുന്നുവെങ്കിലും പിന്നീട് തീരുമാനം പിൻവലിക്കുകയായിരുന്നു. ഡെൽഹിക്ക് പിന്നാലെ പഞ്ചാബും പിടിച്ച് കേരളത്തിലെത്തുന്ന കെജ്രിവാളിന്റെ ബദൽ നീക്കത്തെ മുന്നണികൾ ആശങ്കയോടെയാണ് കാണുന്നത്.
Read also: ഡെൽഹി മുണ്ട്കയിലെ തീപിടിത്തം; ദേശീയ മനുഷ്യാവകാശ കമ്മീഷൻ അന്വേഷിക്കും