തിരുവനന്തപുരം: സ്‌കൂൾതലം മുതൽ കുട്ടികൾക്ക് ലൈംഗിക വിദ്യാഭ്യാസം നൽകണമെന്ന നിർദ്ദേശവുമായി വനിതാ കമ്മീഷൻ അധ്യക്ഷ പി സതീദേവി. ഇക്കാര്യത്തിൽ സർക്കാരുമായി ചർച്ച നടത്തുമെന്നും സതീദേവി കൂട്ടിച്ചേർത്തു. കൂടാതെ സംസ്‌ഥാനത്ത് നിലവിൽ വർധിച്ചു വരുന്ന കുറ്റകൃത്യങ്ങളുടെ നിരക്ക് കുറക്കുന്നതിന് വേണ്ടി പ്രത്യേക ബോധവൽക്കരണ പരിപാടികൾ സംഘടിപ്പിക്കുമെന്നും വനിതാ കമ്മീഷൻ അധ്യക്ഷ വ്യക്‌തമാക്കി.
കഴിഞ്ഞ ദിവസം പാലാ സെന്റ് തോമസ് കോളേജിൽ വച്ച് സഹപാഠി കൊലപ്പെടുത്തിയ നിതിന മോളുടെ വീട്ടിൽ സന്ദർശനം നടത്തിയതിയതിന് പിന്നാലെ മാദ്ധ്യമങ്ങളോട് സംസാരിക്കുമ്പോഴാണ് സതീദേവി ഇക്കാര്യം അറിയിച്ചത്. ലൈംഗിക വിദ്യാഭ്യാസം എന്ന് കേൾക്കുമ്പോൾ പലരുടെയും നെറ്റി ചുളിയാറുണ്ടെന്നും, ഇതിനെ കുറിച്ചുള്ള ചർച്ചകളിൽ വലിയ വിമർശനങ്ങളാണ് ഉയരുന്നതെന്നും വ്യക്‌തമാക്കിയ അധ്യക്ഷ, ലൈംഗിക വിദ്യാഭ്യാസം നടപ്പാക്കിയാൽ നിരവധി പ്രശ്‌നങ്ങൾ പരിഹരിക്കപ്പെടുമെന്നും കൂട്ടിച്ചേർത്തു.
കൂടാതെ ലിംഗനീതിയുമായി ബന്ധപ്പെട്ട് കുട്ടികൾക്ക് ബോധവൽകരണം നൽകുന്നതിനായി ഉന്നത വിദ്യാഭ്യാസ വകുപ്പ് തന്നെ അത്തരം പ്രൊജക്‌ടുകൾ കൊണ്ടുവരണമെന്നും വനിതാ കമ്മീഷൻ അധ്യക്ഷ പറഞ്ഞു. ഒപ്പം തന്നെ ഇത്തരത്തിൽ ഹീനകരമായ കുറ്റകൃത്യം ചെയ്യാനുള്ള മാനസികാവസ്‌ഥ വിദ്യാസമ്പന്നരായ കുട്ടികളിൽ പോലും ഉണ്ടാകുന്നതിനെ കുറിച്ച് ഗൗരവമായ പഠനം നടത്തണമെന്നും പി സതീദേവി വ്യക്‌തമാക്കി.
Read also: അഖിലേഷ് യാദവും കസ്‌റ്റഡിയിൽ; ലഖിംപൂർ ഖേരി ജില്ലയിൽ നിരോധനാജ്‌ഞ
