ചെന്നൈ: കോവിഡ് വ്യാപനം തുടരുന്ന പശ്‌ചാത്തലത്തിൽ തമിഴ്‌നാട്ടിൽ ലോക്ക്ഡൗൺ നീട്ടിയതായി മുഖ്യമന്ത്രി എംകെ സ്‌റ്റാലിൻ അറിയിച്ചു. കോവിഡ് കേസുകളുടെ എണ്ണത്തിൽ ഗണ്യമായ കുറവ് രേഖപ്പെടുത്താത്ത സാഹചര്യത്തിലാണ് നടപടി. ജൂൺ 7 വരെയാണ് ലോക്ക്ഡൗൺ നീട്ടിയത്. നിലവിലുള്ള നിയന്ത്രണങ്ങൾ തുടരുമെന്ന് മുഖ്യമന്ത്രി അറിയിച്ചു.
പച്ചക്കറി, പലചരക്ക് തുടങ്ങിയ അവശ്യ വസ്‌തുക്കളുടെ വിതരണം നിലവിലുള്ളത് പോലെ തുടരും. അവശ്യ വസ്‌തുക്കൾ ഫോണിലൂടെ ഓർഡർ ചെയ്‌ത്‌ വാങ്ങുവാനും സൗകര്യമുണ്ട്. രാവിലെ 6 മുതൽ വൈകുന്നേരം 7 വരെയാണ് അവശ്യ വസ്‌തുക്കളുടെ വിതരണ സമയം. ലോക്ക്ഡൗണുമായി പൊതുജനം സഹകരിക്കണമെന്നും മുഖ്യമന്ത്രി സ്‌റ്റാലിൻ അറിയിച്ചു. ലോക്ക്ഡൗൺ സമയത്ത് ജനങ്ങൾ നേരിടുന്ന പ്രതിസന്ധി ലഘൂകരിക്കാൻ ജൂൺ മാസത്തിൽ ഭക്ഷ്യ കിറ്റുകൾ വിതരണം ചെയ്യുമെന്നും അദ്ദേഹം വ്യക്‌തമാക്കി.
Read also: ലോക്ക്ഡൗൺ നിയന്ത്രണങ്ങളിൽ ഇളവ്; ചൊവ്വ, ശനി ദിവസങ്ങളിൽ കൂടുതൽ കടകൾക്ക് അനുമതി
