വോഗ് ഇന്ത്യയുടെ ‘വുമണ്‍ ഒഫ് ദി ഇയര്‍’ സ്‌ഥാനം നേടിയ സംസ്‌ഥാന ആരോഗ്യമന്ത്രി കെകെ ശൈലജ ടീച്ചറെ പ്രശംസയും അഭിനന്ദനങ്ങളും കൊണ്ട് മൂടുമ്പോള്‍, അതിനിടയില്‍ പട്ടികയില്‍ ഇടം നേടിയ മറ്റ് രണ്ട് മലയാളികളുടെ പേരുകള്‍ മങ്ങിപ്പോകുന്നുണ്ട്. രാജ്യാന്തര നാണ്യ നിധിയുടെ ചീഫ് ഇക്കണോമിസ്‌റ്റ് ഗീതാ ഗോപിനാഥിന്റെയും കോട്ടയം മെഡിക്കല്‍ കോളജിലെ നഴ്‌സ് രേഷ്‌മ മോഹന്‍ദാസിന്റെയും പേരുകളാണത്.
ആഗോള സാമ്പത്തികമാന്ദ്യം നേരിടാനുള്ള ഊര്‍ജസ്വലമായ ശ്രമങ്ങളാണു ഗീതാ ഗോപിനാഥിന്റെ നേട്ടമായി വിലയിരുത്തുന്നത്. കോവിഡ് രോഗം ബാധിച്ച് രോഗം ഭേദമായ ശേഷം ഡ്യൂട്ടിയിലേക്ക് മടങ്ങിയെത്തിയ രേഷ്‌മയുടെ കര്‍ത്തവ്യബോധത്തെ മാസിക അതിന്റെ ലേഖനത്തില്‍ പ്രത്യേകം പരാമര്‍ശിക്കുന്നു.
ഇന്ത്യയിലെ തന്നെ ഏറ്റവും പ്രായം കൂടിയ കോവിഡ് രോഗികളെ പരിപാലിക്കാനും അവര്‍ക്ക് ആവശ്യമായ ചികില്‍സ നല്‍കി രോഗം ഭേദമാക്കാനും സദാ ചികില്‍സകരുടെ കൂടെ നിന്നയാളാണ് രേഷ്‌മയെന്നും ലേഖനത്തില്‍ പറയുന്നു. ഒപ്പം, കേരളത്തിന്റെ ആരോഗ്യ സംവിധാനത്തില്‍ പൂര്‍ണമായ വിശ്വാസമുള്ളയാളാണ് ഈ നഴ്സെന്നും വോഗ് ഇന്ത്യാ ആര്‍ട്ടിക്കിള്‍ വിശദീകരിക്കുന്നു. കെകെ ശൈലജയുടെയും ഗീതാ ഗോപിനാഥിന്റെയും വെവ്വേറെ കവര്‍ ചിത്രങ്ങളുമായാണ് വോഗ് നവംബര്‍ ലക്കം ഇറങ്ങുന്നത്.
