സ്വാശ്രയ മെഡിക്കൽ ഫീസ് വർധന വിദ്യാർഥികളോടുള്ള വെല്ലുവിളി; കെകെ ശൈലജ

തിരുവനന്തപുരം: സ്വാശ്രയ മെഡിക്കൽ കോളേജുകളിൽ എംബിബിഎസ് പഠനത്തിന് ഫീസ് വർധിപ്പിക്കാനുള്ള നീക്കത്തിനെതിരെ ശക്‌തമായ നിലപാടുമായി ആരോഗ്യമന്ത്രി കെകെ ശൈലജ. ഇത്തരം നിലപാടുകൾ ഒരിക്കലും അംഗീകരിക്കാൻ കഴിയില്ലെന്നും ഇത് വിദ്യാർഥികളോടുള്ള വെല്ലുവിളിയാണെന്നും മന്ത്രി പറഞ്ഞു. വിഷയത്തിൽ സുപ്രീം കോടതിയെ സമീപിക്കാനാണ് തീരുമാനം. ഇതിനായി സുപ്രീം കോടതിയിലെ മുതിർന്ന അഭിഭാഷകരെ നിയോഗിക്കുമെന്നും മന്ത്രി അറിയിച്ചു.

സ്വാശ്രയ കോളേജുകളുടെ കഴുത്തറപ്പൻ സമീപനത്തിനെതിരെ പ്രതിപക്ഷ നേതാവ് രമേശ് ചെന്നിത്തലയും രംഗത്തെത്തി. സ്വാശ്രയ കോളേജുകൾക്ക് അനുകൂലമായുള്ള ഹൈക്കോടതി ഉത്തരവിന് പിന്നിൽ സംസ്‌ഥാന സർക്കാരും സ്വകാര്യ കോളേജുകളുമാണ് എന്നാണ് ചെന്നിത്തലയുടെ ആരോപണം.

കഴിഞ്ഞ മാസം 13നാണ് ഫീസ് നിർണയസമിതിയായ ജസ്‌റ്റിസ്‌ രാജേന്ദ്രബാബു കമ്മിറ്റി നിശ്‌ചയിച്ച ഫീസ് വീണ്ടും പരിശോധിക്കുവാനും കോളേജുകൾ ആവശ്യപ്പെടുന്ന പരമാവധി ഫീസ് തന്നെ വിദ്യാർഥികൾ നൽകേണ്ടിവരുമെന്നും അറിയിക്കാൻ ഹൈക്കോടതി ഡിവിഷൻ ബെഞ്ച് ഉത്തരവിറക്കിയത്.

11 ലക്ഷം മുതൽ 22 ലക്ഷം രൂപ വരെയാണ് കോളേജുകൾ വാർഷിക ഫീസായി ആവശ്യപ്പെട്ടത്. എന്നാൽ സ്വാശ്രയ മെഡിക്കൽ കോളേജിലെ ഫീസ് നിർണയിച്ചുള്ള രാജേന്ദ്രബാബു സമിതി 6.22 മുതൽ 7.65 ലക്ഷം രൂപവരെയാണ് ഫീസ് നിർദേശിച്ചിരുന്നത്. ഈ റിപ്പോർട്ട് റദ്ദാക്കിയ ഹൈക്കോടതി മെഡിക്കൽ കോളേജ് ഉടമകളുടെയും രക്ഷിതാക്കളുടെയും വാദങ്ങൾ കേട്ട ശേഷം, ഉടമകൾ ആവശ്യപ്പെടുന്ന ഫീസ് എത്രയാണോ അത് വിദ്യാർഥികളെ അറിയിക്കണമെന്ന് ഉത്തരവിട്ടു.

Also Read:  തദ്ദേശ തിരഞ്ഞെടുപ്പ്; പത്രികാ സമര്‍പ്പണം നാളെ അവസാനിക്കും

ഇതിന്റെ അടിസ്‌ഥാനത്തിൽ പ്രവേശനപരീക്ഷാ കമ്മീഷണർ വിജ്‌ഞാപനം ഇറക്കി. ഈ വിജ്‌ഞാപനം അനുസരിച്ച് വാർഷിക ഫീസ് 6.5 ലക്ഷം എന്നത് 11 ലക്ഷമായും 7.7 ലക്ഷം എന്നത് 22 ലക്ഷമായും ഉയരും. എൻആർഐ സീറ്റിൽ 20 എന്നത് 30 ലക്ഷമായും ഉയരും. ഇതോടെ പ്രതിസന്ധിയിലായിരിക്കുന്നത് സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ കുട്ടികളാണ്.