മലപ്പുറം: ജില്ലയിലെ മഞ്ചേരിയിൽ കർഷകസമര പോരാളികൾക്ക് ഐക്യദാർഢ്യവുമായി എസ്‌വൈഎസ് ഈസ്‌റ്റ്‌ ജില്ലാ കമ്മിറ്റി ഐക്യദാർഢ്യ സംഗമം നടത്തി. നൂറ് കണക്കിനാളുകൾ പങ്കെടുത്ത സംഗമത്തിൽ കേന്ദ്ര സർക്കാരിനെതിരെ ശക്‌തമായ പ്രതിഷേധമാണ് ഉയർന്നത്.
“രാജ്യത്തെ ജനങ്ങളെ പട്ടിണിയറിയാതെ ജീവിതം സാധ്യമാക്കുന്നതിനായി കഠിനാധ്വാനം ചെയ്യുന്ന കർഷകരോട് കേന്ദ്ര സർക്കാർ നീതി കാണിക്കണം“; ഐക്യദാർഢ്യ സംഗമ നേതൃത്വം ആവശ്യപ്പെട്ടു. ജാഗരൺ മഞ്ചും ഇപ്പോൾ സുപ്രിം കോടതിയും സമരത്തിന്റെ ന്യായവശം ഉയർത്തി കാട്ടിയിട്ടും കടുത്ത ധിക്കാരം കാണിക്കുന്ന കേന്ദ്ര സർക്കാർ സമീപനത്തിനെതിരെ ശക്‌തമായ പ്രതിഷേധമാണ് എസ്‌വൈഎസ് ഐക്യദാർഢ്യ സംഗമം രേഖപ്പെടുത്തിയത്.
കുത്തക മുതലാളിമാർക്ക് വേണ്ടി കുഴലൂത്ത് നടത്തുന്നത് കേന്ദ്രസർക്കാർ അവസാനിപ്പിക്കണമെന്നും ശക്‌തമായ ജനകീയ പ്രതിരോധനിര ഉയർന്ന് വരാൻ മുഴുവൻ ജനവിഭാഗങ്ങളും രംഗത്തിറങ്ങണമെന്നും സംഗമം ആവശ്യപ്പെട്ടു.
മഞ്ചേരി ഇരൂപത്തിരണ്ടാം മൈലിൽ നടത്തിയ സംഗമത്തിൽ ഇകെ മുഹമ്മദ് കോയ സഖാഫി, കെപി ജമാൽ കരുളായി, ബഷീർ ചെല്ലക്കൊടി, അബ്‌ദുറഹ്‌മാൻ കാരക്കുന്ന്, സിദ്ധിഖ് സഖാഫി, ഉമർ മുസ്‌ലിയാർ, ഖാസിം ലത്വീഫി, അസൈനാർ സഖാഫി,വിപിഎം ഇസ്ഹാഖ്, സൈനുദ്ധീൻ സഖാഫി ഇരുമ്പുഴി, സയ്യിദ്‌ ഹൈദരലി തങ്ങൾ, യുടിഎം ഷമീർ എന്നിവർ നേതൃത്വം നൽകി.
Related Read: ഡെൽഹിയിലെ സ്‌ഥിതി മോശമായാൽ ഉത്തരവാദി കെജ്‌രിവാൾ; ബിജെപി
